Balanyń qolyn qysyp qalǵan eskalator tolyq tekseriledi - Jeńis Qasymbek
ASTANA. QazAqparat - Astanada eki jasar qyzdy jaraqattaǵan eskalator eski tehnıka emes. Bul týraly tilshilerge QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.
«Naqty eskalator boıynsha biz tolyqtaı tekseremiz. Bul oqıǵa boıynsha jaýapkershilik anyqttalady. Eskalatorlardy jóndeý merzimi tehnıkanyń tıpine, tehnıkany paıdalaný merzimine baılanysty bolady. Aldyn ala aqparatqa súıensek, bul tehnıka eski emes. Ony paıdalaný tártibi bastapqyda bolǵan qujatnama aıasynda iske asyrylǵan», - dedi Jeńis Qasymbek
Budan buryn habarlanǵandaı, Astananyń Ortalyq bazaryndaǵy eskalatorda eki jasar qyzdyń qoly qysylyp qaldy.
Oqıǵa ornyna kelgen jedel járdem qyzmeti tıisti kómekti kórsetip, sábıdi shuǵyl túrde №2 qalalyq balalar aýrýhanasyna alyp ketti. Aýrýhananyń qabyldaý bóliminde balany mamandar qarap shyqty. Eki qolyndaǵy jaraqatyna bastapqy-hırýrgııalyq óńdeý jasaldy, gıpspen tańyldy.
Buǵan deıin Ortalyq bazardaǵy oqys jaǵdaıdyń vıdeojazbasy áleýmettik jelige taraǵan edi.
