Balanyń ınternette ne kórip otyrǵanyna memleketpen birge ata-ana da jaýapty - Abaev

ASTANA. QazAqparat - Memleket táýlik boıy balalardyń qandaı saıtqa kirip otyrǵanyn baqylaı almaıdy. Bul salada ata-analar da óziniń jaýapkershiligin sezinýi kerek. Bul týraly «Ashyq dıalog» baǵdarlamasynda bolǵan QR Aqparat jáne kommýnıkatsııalar mınıstri Dáýren Abaev aıtyp berdi, dep habarlaıdy QazAqparat tilshisi.

Aıta ketsek, jaqynda ǵana aqtaýlyq oqýshylardyń óziniń qurdastarynyń birin baǵanǵa baılap qoıyp, basyna aıran quıyp, jumyrtqa jaǵyp, un shashqany týraly vıdeo tarap ketken bolatyn. Osy jaǵdaı qoǵamnyń ishinde birshama dúrbeleń týǵyzǵan edi. Balalardyń osynaý qatigezdigine jaǵymsyz aqparattardyń qoǵamda kóptep aıtylyp jatqany sebep bolyp otyr ma? Osy suraqqa «Ashyq dıalog» baǵdarlamasynda qonaq bolǵan QR Aqparat jáne kommýnıkatsııalar mınıstri Dáýren Abaev jaýap berdi.

«Bul jaǵdaıǵa qatysty quzyrly organdar istiń mán-jaıyn anyqtar degen senim bildiremin. Qatigezdik týraly aıtar bolsam, bul jerde tereń zertteý jumysyn júrgizý kerek sekildi. Biraq, aqparattyq aǵymnyń balalardyń qalyptasýyna áser etip jatqanyn joqqa shyǵarýǵa kelmeıdi. Memleket óz tarapynan balalardy zııandy aqparattardan qorǵaý turǵysynda belgili bir zańnamalyq sharalardy iske asyryp jatyr. Jýyqta ǵana balalardy damýyna jáne densaýlyǵyna zııan keltiretin aqparattardan qorǵaý týraly zańǵa qol qoıyldy», - deıdi mınıstr.

Atalmysh zańda qatigezdikti nasıhattaıtyn kompıýterlik oıyndardy, aýdıo-vıdeo ónimderdi taratýǵa tyıym salynǵan.

«Ótken jyly zańnamaǵa ózgerister engizilip, biz operatorlardy mektepterge zııandy kontentterden tazartylǵan ınternetti qosýǵa mindettedik. Biraq, memleket otyryp alyp táýlik boıy balalardyń qandaı saıtqa kirip otyrǵanyn baqylaı almaıdy. Ata-analar balalardyń óz toptarynda, pablıkterinde ne kórip, neni taratyp otyrǵanyna jaýapty. Bul - memleket pen ata-analardyń ózara jaýapkershiligi dep aıtar edim», - dedi Dáýren Abaev.