Balanyń erkeligi bireýdiń ólimine sebep bolýy múmkin - TJD
ASTANA. QazAqparat - Astana qalasynyń Tótenshe jaǵdaılar departamenti «112» nómirine balalar erigip otyryp telefon soǵatyn jaıttardyń kóbeıip ketkenin málim etti, dep habarlaıdy QazAqparat.
«Nazar aýdaryńyzdar! 2016 jyly «112» nómirine 500 myńnan asa qońyraý tústi. Sonyń 200 myńy bizdiń jumysymyzǵa qatysty emes, anyqtama alý sıpatyndaǵy jáne erigip otyrǵan balalardyń qońyraýy»,-degen aqparat taratty TJD baspasóz qyzmeti.
Baspasóz qyzmeti jalǵan qońyraý shalǵan adam ákimshilik, tipti, qylmystyq jaýapkershilikke tartylýy múmkin ekenin eske salyp otyr.
«Bireý ómir men ólim arasynda jatqanda, jalǵan qońyraýlardyń kesirinen «112» nómiri bos bolmaı qalady. Astana qalasynyń Tótenshe jaǵdaılar departamenti jalǵan qońyraý shalǵan azamat QR zańyna sáıkes, ákimshilik jáne qylmystyq jaýapkershilikke tartylatynyn eske salady. Anyqtaıtyn suraqtaryńyz bolsa, qalanyń anyqtamaǵa arnalǵan basqa da telefondary bar»,-dep habarlady TJD baspasóz qyzmeti.
