Balanyń durys bilim alýy ata-anasy men ustazyna baılanysty - Saparbaev

Aqtóbe oblysynda barlyǵy 25 mekteptiń qurylysy júrip, jańa oqý jylynda 8 mektep paıdalanýǵa berildi. Onyń úsheýi oblys ortalyǵynda, ózgesi aýdan, aýylda. Mirjaqyp Dýlatov atyndaǵy orta mekteptiń alqashqy qońyrý saltanatyna qatysqan oblys ákimi Berdibek Saparbaev eldiń bolashaǵy bilimdi urpaqta ekenin basa aıtty.

«Árbir halyqtyń bolashaǵy urpaǵynyń bilimi, ilimi, tárbıesi, mádenıetine baılanysty. Sondyqtan árbir memleket óz bolashaǵy úshin bilimge úlken kóńil bóledi. Biz kompıýter, ınternet degendi bilmedik. Ol kezde balalarymyz sheteldiń eń myqty joǵary oqý oryndarynda bilim alady, mektepterdegi ádistemeler dúnıejúzilik standartqa saı daıyndalady, árbir óńirde maman talabyna saı zııatkerlik mektep ashylady, Qazaqstanda álemniń úzdik professorlary dáris oqıtyn joǵary oqý orny bolady dep oılamadyq. Qazir barlyq múmkindik bar. Tek sharshamaı, jalyqpaı jaqsy bilim alý kerek. Qazir ár kún, árbir saǵat qymbat. Balalardyń bilim alýy ata-analaryna baılanysty. Eger ata-ana balasynyń, qoǵamnyń aldyndaǵy jaýapkershiligin tolyq oryndasa balasy bilimdi, tárbıeli bolady. Ekinshiden, ustazǵa baılanysty. Ustaz jan-jaqty bilim berýi kerek. Kitapta jazylǵandy bala ózi oqyp alady, ustaz onyń oıyn damytýy kerek»,- dedi óńir basshysy B.Saparbaev.  

Jańa mektepte búgin «Men elimniń patrıotymyn», «Meniń Otanym - Qazaqstan» atty tárbıe saǵattary ótti. Mektep «Nurly jol» baǵdarlamasy aıasynda salyndy. Qurylysqa Ulttyq qordan 673 mıllıon teńge bólinip, ıgerildi. Munda fızıka, hımııa pánderine arnalǵan arnaıy laboratorııa bar. Sport zal men májilis zaly da qarastyrylǵan.

«Qurylys jumystary kezinde sahna óte úlken boldy. Joba boıynsha 4 grımdeý bólmesi jasalǵan eken. Mektep úshin mańyzdysy - sahna men kórermen zaly. Keıin ózgertip, kórermen zalynyń aýmaǵy keńeıtildi»,- dedi Berdibek Saparbaev.

Buǵan deıin habarlaǵanymyzdaı, Aqtóbede 16 myńnan astam bala 1-synypqa bardy.