Balany zorlaýǵa qatysty shaǵym boıynsha júrgiziletin tergeý OQO prokýrorynyń baqylaýynda

ASTANA. QazAqparat - Ońtústik Qazaqstan oblysynda 7 jasar balany zorlaý qylmystyq isi boıynsha taǵaıyndalǵan psıhologııalyq-psıhıatrııalyq sot saraptamalarynyń qorytyndysy áli daıyn emes. OQO prokýratýrasy osyǵan baılanysty jáne istiń qatysýshylary kámelettik jasqa tolmaǵandyqtan olardyń quqyqtary men tergeý qupııasyn saqtaýdy surady, dep habarlaıdy QazAqparat.

«Bul kúnderi túrli buqaralyq aqparat quraldary men áleýmettik jelilerde «Ońtústik Qazaqstan oblysynda jasóspirimge zorlyq jasaldy» degen aqparat taratylýda. Atalǵan derek boıynsha bıylǵy jyldyń qańtar aıynan bastap Saryǵash aýdanynyń ishki ister bólimi sotqa deıingi tergep-tekserý jumystaryn júrgizip jatyr. Tergeý aıasynda sot psıhologııalyq-psıhıatrııalyq saraptamalar taǵaıyndaldy. Olardyń qorytyndylary áli daıyn emes. Nátıjesi boıynsha Astana qalasynda arnaıy mamandardyń qatysýymen keshendi sot-medıtsınalyq saraptamasy júrgiziledi», - delingen taratylǵan habarlamada.  

Sondaı-aq atap ótilgendeı, jasóspirimniń jeke ómirine qatysty málimetti qorǵaý maqsatynda Qylmystyq-protsestik kodekstiń 96-babyna sáıkes qaýipsizdik sharalary qolǵa alynyp otyr.

«Ońtústik Qazaqstan oblysynyń ýákiletti organdarynyń ókilderi, psıhologtar jasóspirimmen jáne onyń týysqandarymen keshendi psıhologııalyq jumys júrgizýde. Qylmystyq istiń tergelý barysy oblys prokýrorynyń baqylaýynda. Tergeýdiń jan-jaqty, tolyq jáne obektıvti júrgizilýi qamtamasyz etiledi. Іstiń qatysýshylary kámelettik jasqa tolmaǵandyqtan olardyń quqyqtaryn, tergeý qupııasyn, jalpy qupııalylyqty saqtaýdy suraımyz. Nátıjesi týraly keńinen habarlanatyn bolady», - delingen oblystyq prokýratýra habarlamasynda.

Eske salaıyq, OQO-nyń Abaı aýylynda birinshi synyp oqýshysyn uryp-soǵý jáne zorlaý faktisi boıynsha qylmystyq is qozǵalyp, onyń tergelýin OQO ІІD basshylyǵy óz baqylaýyna aldy.

14 naýryz kúni Abaı aýylyna Qazaqstan Respýblıkasyndaǵy Bala quqyqtary jónindegi ýákil, Parlament depýtaty Zaǵıpa Balıevanyń tapsyrmasymen monıtorıngilik toptyń ókilderi bardy. Top quramynda zańger jáne psıholog mamandary bar.

Aıta keteıik, búgin jábirlenýshi bala men onyń jaqyndary táýelsiz mamandardyń kómegine júginý úshin Almatyǵa jolǵa shyqqan bolatyn. Abaı aýylynda turatyn birinshi synyp oqýshysyna qatysty iske qoǵam belsendileri aralasyp, olar balany jetekshi mamandarǵa qaıta teksertip, táýelsiz saraptama jasatýǵa ýáde etken edi.