Balany uryp-soǵý, mektepke jibermeý, qaıyr suratý ata-ana quqyǵynan aıyrýǵa sebep bolady

NUR-SULTAN. QazAqparat - QR Bas prokýratýrasy azamattardyń qandaı jaǵdaıda ata-ana quqyǵynan aıyrylatynyn túsindirdi, dep habarlaıdy QazAqparat.

Vedomstvo málimetinshe, oǵan mynadaı jaǵdaılar sebep bolýy múmkin:

- ata-ana mindetin oryndaýdan jaltarsa, onyń ishinde alıment tóleýden qasaqana jaltarsa;

- dəleldi sebepsiz óz balasyn perzenthanadan, jetim jáne ata-ana qamqorlyǵynsyz qalǵan balalarǵa arnalǵan uıymdardan alyp ketýden bas tartsa;

- ózderiniń ata-analyq quqyǵyn teris paıdalansa (mysaly, balany oqytýǵa qasaqana kedergi keltirse, balalaryn qaıyr suraýǵa nemese urlyqqa baýlysa, balany jezókshelikpen aınalysýǵa ıtermelese, spırttik ishimdik nemese esirtki tutynýǵa tartsa);

- balalaryna qatal qarasa, olarǵa fızıkalyq nemese psıhıkalyq zorlyq-zombylyq kórsetse, ony jynystyq qylmysqa ıtermelese;

- spırttik ishimdik nemese esirtki quraldaryn, psıhotroptyq zattardy jəne sonyń analogtaryn paıdalansa.

Ata-ana óz balasynyń, jubaıynyń nemese otbasynyń basqa músheleriniń ómirine nemese densaýlyǵyna qasaqana qylmystyq quqyq buzýshylyq jasaǵan kezde ata-ana quqyǵynan aıyrylady.

«Ata-ana quqyǵynan aıyrý sot tərtibinde, prokýrordyń jəne qorǵanshylyq nemese qamqorshylyq qyzmetimen aınalysatyn mekemeniń qatysýymen júrgiziledi» dep málim etti Bas prokýratýradan.