Balany sýdan qutqarǵan áskerı qyzmetshi: Bári qas-qaǵym sátte boldy
- Áńgimemizdi týyp-ósken jerińizden bastasaq?
- 1998 jyly Shyǵys Qazaqstan oblysy Kúrshim aýdany Marqakól aýylynda dúnıege keldim. Bes jasymda otbasymmen Glýbokoe aýdany Tarhanka aýylyna kóshtik. Sol jaqtaǵy orta mektepti támamdadym. Mektepten soń Otan aldyndaǵy boryshymdy óteý úshin áskerge kettim. Ulttyq ulannyń Kókshetaýdaǵy 5510 áskerı bólimine tústik. Bul 2016 jyl.
Áskerı ómir ózime unady. Osy baǵytqa birjola bet buramyn dep sheshim qabyldadym. Áskerden kelgennen keıin Óskemendegi Qazaqstan-Amerıkandyq erkin ýnıversıtetiniń joǵarǵy kolledjine «zańger» mamandyǵyna qujat tapsyrdym. 2020 jyly qolǵa dıplom alǵan soń bilimimdi osy ýnıversıtette jalǵastyryp jatyrmyn. Qazir 3-kýrstamyn. Bıylǵy jazda oqýymdy aıaqtaımyn.
- Jumys ótilińiz qaıda bastaldy?
- 2020 jyly jeltoqsan aıynda QR Ulttyq ulany «Shyǵys» óńirlik qolbasshylyǵynyń 5518 áskerı bólimine qaraýyl bastyǵy bolyp jumysqa ornalastym. 6 aıdan keıin 3477 áskerı bólimine atqysh bolyp aýystym. Sol ýaqyttan bastap búginge deıin taban aýdarmaı qyzmet etip kelemin.
- Ákeńiz nemese aǵalaryńyz áskerı qyzmetshi bolǵan ba edi?
- Joq. Biraq ákem jas kezinde áskerge barǵan. Sony maǵan áńgimelep aıtyp beretin. Qarýlastaryn, ártúrli qyzyqty oqıǵalardy eske alyp otyratyn. Bul da meniń qyzyǵýshylyǵymdy oıatty. Áskerı forma kıgen adamdardy kórgende sol sııaqty bolǵym keletin-tuǵyn. Bala kúngi armanym desem ótirik aıtqandyq emes.
Anamnyń týǵan baýyrynyń áskerı salada qyzmet etip júrgenine 15 jyldan asty. Ol maǵan aqylyn aıtyp, jol nusqap otyrady.
- Sýǵa batyp bara jatqan qarshadaı balany aman alyp qalypsyz. Sol oqıǵa týraly tereńirek baıandap berseńiz.
- Bul oqıǵa 2022 jyldyń shildesinde boldy. Saǵat keshki 18.30 shamasy. Demalys bolǵandyqtan dosym ekeýimiz Ertis ózenine shomylýǵa kelgenbiz. Kenet bir áıeldiń aıǵaılaǵan daýysy estildi. Sol jaqqa qaraı tura umtyldym. «Ne bolyp qaldy?» dep suraǵanymda «Áne, balam sýǵa batyp barady! Kómektesińizdershi!» dep boz ingendeı bozdady. Esh oılanbastan qaltamdaǵy telefonymdy jerge tastaı saldym da sýǵa sekirdim. Júzip jetip, balany jaǵaǵa qaraı jetkizdim. Bári qas pen kózdiń arasynda boldy. Ózenniń aǵyny qatty eken. Múlde álim qalmady. Kenet ózimniń aǵyp bara jatqanymdy sezdim. Al júzerge dármen joq. Sol sátte esimnen tanyp qalyppyn. Bir ýaqytta kózimdi ashsam meni jádel járdemmen aýrýhanaǵa apara jatyr. Sóıtsem, meni batyp bara jatqanda jaǵalaýdaǵy azamattardyń biri alyp shyǵypty. Qudaıǵa shúkir, bári jaqsy aıaqtaldy.
- Ózińiz de ajal aýzynan aman qalypsyz ǵoı. Osy erligińiz úshin qandaı da bir marapat berildi me?
- QR Ulttyq ulany basshylyǵynan «Ulttyq ulan qyzmetiniń úzdigi» jáne «Qoǵamdyq tártipti saqtaǵany úshin» medaldaryn aldym. Sodan soń Shyǵys Qazaqstan oblysy Tótenshe jaǵdaıdar departamenti «Sýǵa batqandardy qutqarǵany úshin» medalin berdi.
- Sol oqıǵadan keıin balamen nemese onyń ata-anasymen jolyqtyńyz ba?
- Iá. Áke-sheshesi rızashylyǵyn bildirip, úılerine shaqyrdy. «Shaqyrǵan jerden qalma» deıdi ǵoı, baryp qonaq boldym. Dastarhan basynda «Balamdy qutqarǵanyńyz úshin myń alǵys! Ózińizdeı er jigitter kóp bolsa» dedi. «Bul – bizdiń mindet. Meniń ornymda bolsa kez kelgen áskerı adam solaı ister edi» dedim. 6 jasar balapan da rahmetin aıtyp, meni umytpaıtynyn jetkizdi. Áli kúnge deıin aralasyp turamyz. Meıram saıyn qonaqqa shaqyrady.
- Qazir jastar arasynda áskerge barǵysy kelmeıtinder kóbeıip ketti. Sol týraly ne oılaısyz?
- Árbir jigit áskerge barýy kerek. Sebebi sonda shynyǵyp, jan-jaqty jetilip shyǵady. Ázirge boıdaqpyn. Eger keleshekte ulym bolsa, mindetti túrde áskerge jiberemin. Bul – Otan aldyndaǵy borysh. Erkek kindikti jan óz jerin, elin qorǵaý kerek! Al qorǵaý úshin áskerı daıyndyǵy bolýy tıis.
- Jumystan tys ýaqytta nemen aınalysqandy jaqsy kóresiz?
- Sýda júzgendi unatamyn. Sodan keıin jeńil atletıkamen aınalysamyn. Dostarymmen birge tabıǵat aıasyna shyǵyp, serýendep turamyn.
- Aldaǵy maqsat-muratyńyz qandaı?
- Josparym túgeldeı osy áskerı salaǵa qatysty. Áýeli ýnıversıtetti aıaqtap, sosyn ofıtserlik shen alyp, qyzmet baspaldaǵymen kóterile bergim keledi. Shamam kelgenshe adamdarǵa kómektessem deımin. Meniń tárbıem sondaı. Qaıda júrsem de bireýge tıtteı de bolsyn paıdam tıse menen baqytty adam joq. Bala kúnimde de kórshi-qolańnyń úı sharýalaryna qolǵabys bolyp, qarttardyń júgin tasyp beretinmin. Ókinishke qaraı, qazir kóbisi tek ózin ǵana oılaıtyn bolyp bara jatyr. Bótenniń qıyndyǵyn kórse de qolushyn sozatyndar sırek. Sol úshin óskeleń urpaqty baýyrmaldyqqa, patrıottyqqa tárbıelep, jaqsylyq jasaı bilýdi úıretýimiz kerek.
- 7 mamyr – Otan qorǵaýshy kúnine oraı áriptesterińizge, elimizdegi kúlli jigitterge qandaı tilek aıtasyz?
- Eń birinshi, densaýlyq tileımin. Sebebi densaýlyqsyz ómirdiń sáni ketedi. Odan keıin otbasylarynda bereke bolyp, qyzmetteri óse bersin. Qudaı elimizdi tynyshtyqtan, birlikten aıyrmasyn! Bozbalalarǵa, jas jigitterge aıtarym – áskerge baryńdar. Ásker qataryn tolyqtyryp, el qaýipsizdigin birge kúzeteıik!
- Áńgimeńizge kóp rahmet!
