Balany perzenthanadan shyǵararda shoý uıymdastyrǵan durys emes - atyraýlyq dárigerler
Atyraý oblystyq perzenthana dárigerleriniń aıtýynsha, ata-analar ómirge kelgen nárestelerdi úıine shyǵarar aldynda shoý uıymdastyratyn bolǵan.
«Kún saıyn saǵat 14:00-den bastap jumys ýaqytynyń sońyna deıin perınataldyq ortalyq aldy toıdaǵydaı ý-shýǵa, qyp-qyzyl bıge, qymbat kólikterge, shoý baǵdarlamalarǵa, anımatorlarǵa tolady. Ata-analar, týma-týys, dos-jaran kishigirim toı jasaıdy. Birneshe ret eskertý jasaldy. Eskertýge qaramastan, dýmandy toı kúnde jalǵasady. Turǵyndar jańa bosanǵan anaǵa, ómirge kelgenine jeti kún tolmaǵan balasyna erekshe kútim men tynyshtyq kerek ekenin bile tura, ánshilerdi, anımatorlardy jaldap, dron ushyryp, kontsert uıymdastyrýdy úırenshikti ádetke aınaldyryp otyr», -dep alańdaýshylyq bildirdi dárigerler.
Dárigerlerdiń pikirinshe, turǵyndar uıymdastyratyn shoý baǵdarlamalar medıtsına qyzmetkerleriniń jumysyna kedergi keltiredi.
«Bizdiń ortalyq – medıtsınalyq mekeme. Ǵımarat tıptik jobamen salynǵan. Sábılerdi úıine shyǵarý úshin basqa oryn qarastyrý múmkindigi joq. Munda tek qýanysh qana emes, basqa da jaǵdaılar bolyp jatady. Analardyń biri sábıin qushaǵyna alsa, keıbir ananyń sábıi jansaqtaý bóliminde ómir úshin kúresip jatady. Ásirese, 500-700 gramm salmaqpen ómirge kelip, 2-3 aı arnaıy qurylǵylarda ońaltýdan ótip jatqan nárestelerge tynyshtyq asa qajet. Dańǵyrlaǵan áýennen sábılerdiń tynyshtyǵy buzylady. Árıne, náresteni úıge shyǵarý – úlken qýanysh. Degenmen, ár nárseniń óz orny, shegi bolýy kerek. Perzenthananyń aldynda toı-dýman uıymdastyrmaı, náresteni shyǵaryp alýǵa 2-3 týysy, jaqyn adamdary kelse... Jyldyń tórt mezgilinde bolatyn ystyq pen sýyqtyń, jeldiń jaısyz áserinen ana men balany saqtap, úıine ama-esen jetkizip, qýanyshty óz shańyraǵynda toılasa, ıgi is bolar edi», - dep usynys jasady dárigerler.
Eske sala ketelik, buǵan deıin Atyraý ákimi eskertkish mańynda kógershinderge nan qaldyǵyn shashpaýdy usynǵanyn jazǵan edik.
