Balany onlaın rejimde turaqty tirkeýge turǵyzýǵa bola ma

ASTANA. QazAqparat - Osy jyldyń sońyna deıin el turǵyndaryna balany turǵylyqty mekenjaı boıynsha onlaın rejimde tirkeýge bolatyn ádis-amal usynylmaq. Bul týraly «Ashyq dıalog» portalynda turǵyndardyń suraǵyna jaýap bergen Aqparat jáne kommýnıkatsııalar mınıstri Dáýren Abaev málim etti.

«Balalardy turǵylyqty mekenjaıy boıynsha tirkeý qyzmetin nelikten onlaın rejimge kóshirmeske? E.gov portalynda kámelettik jastan asqandar tirkele alady. Al balalaryn tirkeý úshin ata-analar mindetti túrde HQO-ǵa barýy kerek. Al ádette jumysynda júretin ata-analarǵa balalaryn HQO-ǵa aparýǵa ýaqyt tabýy qıynǵa túsetini anyq. Sebebi, mıgratsııalyq polıtsııa jumys kúnderi keshki 18:30-ǵa deıin, al senbide 13:00-ge deıin ǵana jumys isteıdi. Osyǵan baılanysty balany turǵylyqty mekenjaıy boıynsha turaqty tirkeý qyzmetin onlaın rejimge aýystyrý qarastyrylyp jatqan joq pa?» - dep suraq qoıady Nurjan Abıtov esimdi turǵyn.

Bul suraqqa jaýap bergen Aqparat jáne kommýnıkatsııalar mınıstri Dáýren Abaev bul baǵyttaǵy jumysty úılestirý bastalyp ketkenin habarlady.

«Qazirgi ýaqytta «Qazaqstan Respýblıkasynyń turǵyndaryn turǵylyqty mekenjaıy boıynsha tirkeý» memlekettik qyzmetin ońtaılandyrý aıasynda múddeli memlekettik organdarmen birge 16 jasqa deıingi balalardy turǵylyqty mekenjaıy boıynsha elektrondy úkimettiń veb-portaly arqyly tirkeý múmkindigin iske asyrý boıynsha jumys júrgizilip jatyr. Atalmysh múmkindikke osy jyldyń sońynda qol jetkizýge bolady dep kútilýde. «Elektrondy úkimettiń» damýyndaǵy belsendi azamattyq ustanymyńyz úshin alǵys bildiremiz», - dep jaýap berdi Dáýren Abaev.