Balany mektepke ornalastyrýda turaqty tirkeý kerek pe
ASTANA. QazAqparat - Balany mektepke ornalastyrý úshin turǵylyqty meken-jaıy boıynsha turaqty tirkeý kerek pe? Bul suraqqa QR Úkimetiniń baspasóz ortalyǵynda QR Bilim jáne ǵylym vıtse-mınıstri Ashat Aımaǵambetov jaýap berdi, dep habarlaıdy QazAqparat tilshisi.
«Balany mektepke qabyldaý týraly aıtarym - bul jerde tek zańǵa súıene otyryp sheshim qabyldaý kerek. Bizde Bilim týraly zań, Úkimettiń 128-qaýlysy boıynsha «balany qabyldaýdyń tıptik qaǵıdattary» bar. Mine, osy tıptik erejelerde ata-analardyń siz aıtqan qujatty (turaqty tirkeý anytamasy - avt) ótkizýi tıis ekeni týraly jazylmaǵan. Turaqty tirkeý demek, talap etilmeıdi. Sondyqtan, biz Astanada mundaı talaptardyń durys emes ekenin aıttyq. Balalar men ata-analar óz talap-tilegi boıynsha kez kelgen bilim berý uıymyna bere alady. Ekinshiden, Astanada mektepterde oryn tapshylyǵy máselesi bar ekenin bilesizder. Sondyqtan, osy máseleni esepke alý kerek», - dedi Ashat Aımaǵambetov.
Aıta keterligi, budan buryn Úkimet otyrysynda baıandama jasaǵan Bilim jáne ǵylym mınıstri Erlan Saǵadıev memlekettik mektepterdiń barlyǵynda 280 myń muǵalim baryn atap ótken edi.
«Qajettilik - bes myń. Pedagog mamandyǵy boıynsha daıyndalǵan kadrlar jetkilikti. Qalǵan az ýaqyttyń ishinde mektepter men bilim bólimderi bos oryndarǵa muǵalimderdi qabyldaýy kerek», - deıdi Erlan Saǵadıev.
