Balany mektepke daıyndaýǵa qansha aqsha kerek - Ata-anadan keńes

Oqýǵa qajetti mektep quraldary men kıim-keshektiń ata-ana qaltasyna qosymsha salmaq bolatyny ras. «QazAqparat» HAA tilshisi balasyn birinshi synypqa bergen ata-ana Aınur Amanbaevamen tildesip, bir balany mektepke daıarlaýǵa qansha qarajat jumsalatynyn eseptep kórdi.

«Tamyzdyń basynda dúkenderde jappaı jeńildikter bolady, sol sátti paıdalanyp, ári mektep taýarlaryn izdep sabylǵan ata-analardyń qarbalasy bastalmaı turyp, qyzymyzdy erterek kıindirdik», - degen Aınur balany mektepke ázirleýge qatysty birneshe aqyl-keńesterimen bólisti.

«Astanada mektep formasyna qoıylatyn birneshe talaptar bar. Forma qoıý kók tústi jáne klassıkalyq stılde bolýy tıis jáne beldemsheler tizeden 5 sm artyq aspaýy tıis. Formany ata-ananyń ózi bazardan, dúkennen satyp alady nemese tapsyryspen tiktire alady. Áriptesterimniń aqyl-keńesimen mektep formasyn alý úshin Abaı kóshesinde ornalasqan dúkenge bardyq jáne onda jeńildikpen 2 jeıde, keýdeshe, jempir, beldemsheni ortasha baǵa - 5 myń teńgeden satyp aldyq. Jalpy jınaq 25 myń teńgege aınaldy.

Keı mektepte sporttyq kıimge de aq fýtbolka, qara shalbar syndy talaptar qoıylady. Sondyqtan, sporttyq kıim almaı turyp, mektepke habarlasyp, mán-jaıdy anyqtap alǵanyńyz abzal.  Sporttyq kıimdi de ata-ananyń ózi áperedi jáne qyzym ekeýmiz «Balalar álemi» dúkeninen qoıý kók tústi shalbar men jeıdeni jáne aq tústi fýtbolkany jeńildikpen 6 myń teńgege satyp aldyq.

Balalar jyldam ósetin bolǵandyqtan, ázirge eki aıaq kıimmen shekteldik. Aıaq kıim tańdaǵanda olardyń jeńil ári yńǵaıly bolýyna basa mán berdik. Nátıjesinde, eki aıaq kıimge 5 myń teńge jumsadyq.

Oqýǵa arnalǵan kerek-jaraq zattardy ortalyq bazardan alǵan anaǵurlym tıimdi. Bazardyń kire beris tusy anaǵurlym qymbat, orta jaǵyna barsańyz, sol taýarlardy arzanyraq baǵaǵa tabýǵa bolady. «Barlyq taýardy menen alsańyz, 15 teńgelik dápterdi 5 teńgeden beremin» deıtin saýdagerler bar. Ondaı ońaı oljaǵa qýanbańyz. Dápteri arzan bolǵanymen, saýdagerdiń qalam, boıaý, ermeksaz syndy ózge taýarlary edáýir qymbatqa túsedi. Artyq shyǵynǵa ushyramaý úshin erinbeı baǵalardy salystyryp shyǵyńyz.

Bastaýysh synyp balalaryna eń qajetti nárse - túrli-tústi qalam, sebebi olar sýretti kóp salady. Sondyqtan, sýretke qajetti qalam, albom, qylqalamdardy kóterme baǵamen kóptep alyp qoıǵanyńyz jón. Keı mektepter kúndeliktiń syrtynda memlekettik rámizderdiń bolýyn talap etetin kórinedi, sondyqtan birden kók tústi kúndelik aldyq. Barlyq kerek-jaraq quny 6 myń teńgeni qurady.

Ata-analardyń kópshiligi mektep tabaldyryǵyn jańa attaǵan balaǵa dóńgelegi bar aýyr sómkelerdi alyp beredi. Meniń oıymsha, oǵan áli erte. Qazirgi oqýlyqtardy da aýyrsynyp, qyzymyzdy mektepke ózimiz aparyp, ózimiz ákelemiz dep josparlap otyrmyz. Aqyldasa kele, jeńil ári kir jýý mashınasymen ońaı jýylatyn tórt myń teńgelik qyzǵylt sómkeni tańdadyq».   

«Negizgi kerek-jaraqtardan bólek, bant, kolgotkı, shulyq, sekildi usaq-túıek shyǵyndardy qosqanda bir balany mektepke daıarlaýǵa shamamen 52 myń teńge jumsadyq. Aqshany únemdep, jeńildikterdi paıdalanýdyń arqasynda 52 myń jumsap otyrmyz, áıtpese ózge tanystarym bir balaǵa 70-80 myń teńge jumsaǵandaryn aıtyp júr. Aı sońynda oqýlyqtyń jaıyn surastyramyz, mektepten berilmese, oqýlyqty da ózimizge satyp alýǵa týra keledi. Qysqy kıimderdi de áli almadyq», - deıdi A.Amanbaeva.

 Eske sala ketsek, jyl saıyn 1 tamyz - 30 qyrkúıek kúnderi Qazaqstanda «Mektepke jol» aktsııasy júrgiziledi. Aktsııa aıasynda elimizde az qamtylǵan jáne kópbalaly otbasylarda ómir súrip jatqan, jetim jáne ata-anasynyń qamqorlyǵynsyz qalǵan balalarǵa áleýmettik kómek kórsetiledi. Ótken jyly 320 myń bala 2 mlrd 460 mıllıon teńge bolatyn tıisti mektep quraldarymen, kıim-keshektermen (mektep formasy, sport kıimderi, aıaq kıimder jáne t.b.) qamtamasyz etildi.