Balany komaǵa túsirgen elordalyq stomatologııaǵa tekseristiń nátıjesi jarııalandy
NUR-SULTAN. QazAqparat - Elordada tisin emdetken balany es-tússiz halge túsirgen tis emhanasyna tekserý júrgizildi. Onyń qorytyndysyn QR Densaýlyq saqtaý mınıstrligi Taýarlar men qyzmetterdiń sapasy men qaýipsizdigin baqylaý komıteti tóraǵasynyń orynbasary Laýra Ahmetnııazova jarııa etti, dep habarlaıdy QazAqparat tilshisi.
«Keshe tekserýdi aıaqtadyq. Nátıjesinde birneshe zańbuzýshylyqty anyqtadyq. Olardyń bastylary – Sevoflýran preparatymen jasalǵan jalpy anestezııaǵa qosa, 4 jasqa deıingi balalarǵa egýge bolmaıtyn, Mepıvastezın jergilikti anestezııa preparaty qoldanylǵan», - dedi ol búgin ótken brıfıngte.
Sonymen qatar onyń aıtýynsha, balany emdemesten buryn allergııaǵa qarsy synama da alynbaǵan. Anestezıolog-reanımatolog dáriger jalpy narkoz berýge 15 mınýt qalǵanda ǵana balany teksergen. Al standartqa sáıkes dáriger patsıentti boljaldy ota jasalatyn sátten keminde 24 saǵat buryn qaraýy tıis.
«Komıssııa qorytyndysy boıynsha patsıent jaǵdaıynyń nasharlaýy egilgen preparattardyń birine anafılaktıkalyq shoktyń damýymen baılanysty bolýy barynsha yqtımal», - dedi Laýra Ahmetnııazova.
Eske salaıyq, elorda turǵyny Anastasııa Zelenaıa eki jarym jastaǵy balasy stomatologııalyq klınıkaǵa qaralǵannan keıin es-tússiz kúıge túskenin habarlaǵan bolatyn. Bala 10 táýlikten astam esin jııa almaı jatyr.
Oqıǵaǵa baılanysty Densaýlyq saqtaý mınıstri Eljan Birtanov túsinik berdi. «Jaǵdaıdy baqylaýymda ustap otyrmyn. Ókinishke qaraı, balanyń jaǵdaıy óte aýyr. Biraq, dárigerler tarapynan medıtsınalyq kómek barynsha kórsetilýde. Oǵan tolyqqandy deńgeıde járdem beriledi», - dedi mınıstr.
Sonymen birge, ol QR DSM Taýarlar men qyzmetter qaýipsizdigi jáne sapasyn baqylaý komıtetiniń tóraıymy Lıýdmıla Bıýrabekovaǵa atalmysh stomatologııalyq klınıkany tekserýdi tapsyrǵan edi.
