Balany gadjetterge táýeldilikten qalaı aryltýǵa bolady
«Almatydaǵy psıhıkalyq densaýlyq ortalyǵynyń dárigerleri balalardy gadjetten tez arada ajyratyp almasa, sońy jaqsylyqqa aparmaıdy» dep dabyl qaǵyp otyr. Aıtýlarynsha, gadjetke táýeldilik emdeledi. Eń bastysy, balaǵa onyń zııan ekenin aıtyp, kózin jetkize bilý kerek.
«Birinshiden, balaǵa gadjetten ata-anasy mańyzdy bolýy kerek, ıaǵnı áke-sheshe perzentin ózine qarata bilýi kerek. Urpaǵynyń psıhıkasynyń durys bolýy - aldymen solardyń mindeti. Biz kelisýimiz kerek balamen. Qazirgi balany aldaýdyń keregi joq. Balany aldasańyz, ol kerisinshe siz bermegen málimetti daladan nemese ǵalamtordan taýyp alady. Sondyqtan, balamen biz ashyq sóılesip kelisimshartqa otyrýymyz kerek», - deıdi psıhıkalyq densaýlyq ortalyǵynyń dırektory Sapar Rahmansheev.
Spıkerdiń sózinshe, psıhıkalyq densaýlyq ortalyǵy qalalyq bilim basqarmasymen birge 3 myńnan asa oqýshyǵa saýalnama júrgizdi. Qazir mamandar saraptama jasap jatyr. Sonyń nátıjesinde balalardy gadjetten ajyratyp alý joldaryn qarasatyrady. Psıhıatr dáriger Sofııa Ábildaeva ata-ana men bala arasyndaǵy kelispeýshilikke osy telefon sebep ekenin aıtty.
«Adam kináni aldymen ózinen izdeýi kerek. Gajetti ápergen, ınternetti qosqan, oǵan qosa qadaǵalaýdy azaıtqan balanyń áke-sheshesiniń ózi emes pa? Barlyq jaǵdaıdy jasap qoıady. Gadjetke táýeldilik degen dıagnoz joq, árıne. Biraq bilesiz be, durys uıyqtamaý, durys tamaqtanbaý, qozǵalystyń joqtyǵy densaýlyqqa nuqsan keltiredi. Sońy sozylmaly aýrýlarǵa aparady», - deıdi dáriger.
Onyń aıtýynsha, balalar gadjetti bilim alý úshin ǵana qoldanýy tıis. Sonyń ózinde 7 jastan 12 jasqa deıin 1 saǵat qoldanýy kerek. Al, 12 jastan 18 jasqa deıin 2 saǵat ustaǵany jón.
«Telefonnyń ekrany óte kishkentaı. Ásirese, odan oıyndar óte usaq kórinedi. Mıǵa únemi salmaq túsip turatyndyqtan, demalyp úlgermeıdi. Qazir psıhıkalyq densaýlyq ortalyǵynda 2 jarym myńǵa jýyq bala men jasóspirim tirkeýde tur. Jıi kezdesetin dıagnoz - aýtızm men shızofrenııa», - dedi ol.
