Balany býllıngten qorǵaý tujyrymdamasynyń jobasy talqylanyp jatyr - Dınara Zakıeva
«Qazir Qazaqstan Respýblıkasynyń «Qazaqstan Respýblıkasyndaǵy balanyń quqyqtary týraly» Zańyna jáne Qazaqstan Respýblıkasynyń «Bilim týraly« Zańyna engizý usynylyp jatqan «býllıng« uǵymy belsendi talqylanýda.
Jurtqa málim, QR Prezıdenti Qasym-Jomart Toqaev QR 2021 jyldyń qańtarynda VII shaqyrylǵan Parlamentiniń birinshi sessııasynyń ashylýynda balalardyń quqyqtaryn qorǵaý, olardyń qaýipsizdigin qamtamasyz etý jáne býllıngtiń
aldyn alý máselelerin sheshý úshin sharalar qabyldaý qajet ekenin aıtty. Buǵan deıin Prezıdent 2020 jylǵy Joldaýynda kıberbýllıngtiń aldyn alý boıynsha sharalar qabyldaý qajettigin erekshe atap ótken», dep jazdy Dınara Zakıeva Facebook-tegi paraqshasynda.
Býllıng (qorlaý) - balalardyń aldynda turǵan, kóbinese mektepte kezdesetin ózekti máselelerdiń biri. QR Ulttyq densaýlyq saqtaý ortalyǵynyń málimetterine sáıkes 2018 jyly elimizdegi oqýshylardyń 12%-dan astamy býllıng pen qorlaýǵa ushyraǵan. Tek ótken jyldyń ózinde 143 jasóspirim ózine qol jumsaǵan, 306 jasóspirim buǵan árekettengen.
«Atalmysh máseleni zertteý, aldyn alýǵa baǵyttalǵan baǵdarlamalar ázirleý, osy qubylysqa ákeletin sebeptermen aınalysý, mekteptegi býllıngten (qorlaýdan) qorǵaý úshin tujyrymdamanyń ózin engizý qajet», - deıdi Dınara Zakıeva.
Onyń aıtýynsha, tujyrymdamanyń bolmaǵandyqtan resmı statıstıka da júrgizilmeıdi.
«Tujyrymdama redaktsııasyn talqylaý maqsatynda barlyq tilek bildirýshiler QR Bilim jáne ǵylym mınıstrliginiń alańynda ótetin kishi topqa biriktirildi. Tujyrymdamanyń redaktsııasynda jumys isteýge nıet bildirgenderdiń bári talqylaýǵa kedergisiz qosyldy. Atalmysh topqa jyldar boıy balalar men otbasylarǵa, sonyń ishinde zorlyq-zombylyq qurbandaryna kómektesetin kóptegen qoǵam qaıratkerleri, sarapshylar qatysýda. Olardyń qatarynda Qýat Dúısen - Ahmet Baıtursynuly atyndaǵy Til bilimi ınstıtýtynyń kishi ǵylymı qyzmetkeri, PhD doktorant, belgili professor M. Sh. Qoǵamov, belgili til mamandary da bar», - dedi ol.
Onyń aıtýynsha, jumys toptarynyń otyrystaryna qatysqysy keletinderdiń barlyǵyna ár sársenbi kúni saǵat 15.00-de QR Parlamentiniń saıtynda otyrystyń tikeleı efıri ótedi. Otyrys memlekettik jáne orys tilderinde júrgiziledi.
«Tujyrymdamanyń redaktsııasy ázirlengennen keıin ol negizgi jumys tobynda ótkiziletin talqylaýǵa shyǵarylady. Jumys toby ony talqylap, daýys berý ótkizedi. Ár otyrystyń aldynda 109 adam qatysatyn jumys jáne saraptama toptarynyń barlyq múshelerine kesteler memlekettik jáne orys tilderinde jiberiledi», - dedi Dınara Zakıeva.
Qoǵamdyq keńestiń tóraıymy óziniń de ata-ana ekenin aıtyp, bul usynys eń aldymen elimizdiń barlyq balasyn qorǵaý úshin engizilip jatqanyn atap ótti.
«Ókinishke qaraı, qazir qoǵam ókilderiniń keıbiri syndarly usynys jasamaı, balalarǵa kómektesý tájirıbesi bolmaı, protsesti saıasattandyrýda, halyqty býllıng úshin jaza (onyń ishinde qylmystyq jaza) qarastyrylǵan dep adastyryp, aıla-sharǵy jasap basqa da shyndyqqa saı kelmeıtin aqparat taratyp júr.
Shyndyqqa saı kelmeıtin aqparatty taratqandarǵa áreketteri úshin zań boıynsha jaýapkershilik kózdelgenin eske salǵym keledi.
Barlyq aqparatty QR Parlamentinen nemese jumys tobynyń jetekshisi retinde menen resmı túrde suraýlaryńyzdy ótinemiz», dedi Dınara Zakıeva.
