Balany 1-synypqa qabyldaýǵa qandaı qujattar kerek

ALMATY. QazAqparat- Almatyda birinshi synyp oqýshylarynyń qujattaryn qabyldaý 1 sáýirde bastalady, dep habarlaıdy QazAqparat tilshisi.

Birinshi synyp oqýshylarynyń qujattaryn qabyldaý 1 sáýirde bastalyp, 1 tamyzǵa deıin jalǵasady. Bul – bilim berý protsesine qatysýshylarǵa yńǵaıly bolý úshin qabyldanǵan sheshim.

«Ata-analar mektepti aldyn ala anyqtap, oqýǵa qajetti qujattardy ýaqytyly tapsyrady, sondaı-aq balalardy oqý quraldarymen qamtamasyz etedi. Mektep basshylyǵy synyptardy jınaqtap, qajetti oqýlyqtardy aldyn ala satyp alady. Sonymen qatar pedagogter quramyn anyqtap, saǵat sanyn bóledi»,- dep habarlady qalalyq ákimdiktiń baspasóz qyzmeti.

Ótinishti egov.kz arqyly berýge bolady.

Qajetti qujattar tizimi:

- Ata-analardyń ótinishi (nemese olardy almastyratyn tulǵalar);

- Balanyń týý týraly kýáliginiń kóshirmesi;

- «Bala densaýlyǵy pasporty» 026/ý-3 nysany boıynsha densaýlyq jaǵdaıy týraly qujat;

- 063/ý nysany boıynsha densaýlyq jaǵdaıy týraly qujat;

- 3h4 kólemindegi 2 foto.

Ótinish bir jumys kúni ishinde qarastyrylady.