Balańyzǵa qaýip tónip tur: Polıtseıler alaıaqtardyń túrli ádis-tásilderin aıtyp berdi

Oblystyq polıtsııa departamenti baspasóz qyzmetiniń málimetinshe, alaıaqtar negizinen egde jastaǵy azamattarǵa telefon soǵyp, ózderin bank nemese memlekettik organ qyzmetkeri retinde tanystyrady.

- «Sizdiń shotyńyzdan aqsha urlamaqshy boldy, qarajatyńyzdy qaýipsiz shotqa aýdarý kerek» dep aıtyp, keıin silteme jiberedi. Odan bólek, «Jańa qosymshany shuǵyl ornatyńyz, bank qaýipsizdigin jańartamyz» dep sendiredi. Shyn máninde, qosymshany ornatqannan keıin, alaıaqtar sizdiń shotyńyzǵa tolyq qol jetkizedi, - delingen aqparatta.

«Kommýnaldyq eseptegish ornatý nemese zeınetaqyny qaıta esepteý» tásili de bar. Alaıaqtar ózderin kommýnaldyq qyzmet nemese BJZQ qyzmetkeri retinde tanystyryp, SMS-kod nemese jeke derekterdi suraıdy.

- «Balańyzǵa qaýip tónip tur» nemese «Jol-kólik apatyna qatysty habar bar» degen alaıaqtar sizge psıhologııalyq qysym jasap, «jedel aqsha kerek» dep qorqytyp, qarajat suraıdy. Keıde olar shynaıy sııaqty jasalǵan vıdeo nemese aýdıo arqyly týysyńyzdyń daýysyna keltirip, aqsha suraýy múmkin. Sondaı kezde árdaıym naqtylap alý qajet. Emotsııaǵa berilmeńiz. Qysym jasaı bastasa, sóılesýdi toqtatyńyz, - delingen habarlamada.

Bankke nemese memlekettik organǵa tek resmı nómirleri arqyly habarlasyńyz. Qupııa derekterdi bermeńiz, olar: karta nómiri, CVC/CVV, SMS-kod, PIN-kod, qupııa sózder.

- Belgisiz qosymshalardy ornatpańyz, kúmándi siltemelerge ótpeńiz. Bankter eshqashan telefon arqyly jeke derekterdi suramaıdy. Ata-analaryńyzdy, áje-atalaryńyzdy eskertińiz. Olarǵa bul jaǵdaılardyń bar ekenin, eshkimge jeke derekterdi bermeý kerektigin túsindirińiz, - dep eskertti polıtseıler.

Eske salsaq, osyǵan deıin SQO-da byltyr ınternet alaıaqtar turǵyndardyń 1,5 mlrd teńgesin qoldy etkeni habarlanǵan.