Balańyzdyń esirtki satýmen aınalysyp júrgenin qalaı anyqtaýǵa bolady – ІІM keńesi
ASTANA. KAZINFORM – Jyl basynan beri esirtki qylmysyn jasaǵan 30 jasóspirim ustaldy. Bul týraly ІІM Esirtki qylmysyna qarsy is-qımyl departamenti bastyǵynyń orynbasary Baqytjan Ámirhanov aıtty.
«2024 jyldyń ótken kezeńinde esirtki qylmysyn jasaýǵa qatysqany úshin 30 kámeletke tolmaǵan ustaldy. Tek ótken aptada eki kámeletke tolmaǵan qolǵa tústi. Shymkentte mamyr aıynda orta mektepti bitirgen jasóspirim ustaldy. Odan 13 paket mefedron tárkilendi. Kúni keshe ǵana Kókshetaýda 14 jastaǵy jasóspirim ustalyp, odan salmaǵy 200 gramnan astam 55 paket mefedron tárkilendi. Jaýap alý barysynda jasóspirim osyndaı tásilmen moped satyp alýǵa aqsha tapqysy kelgenin aıtqan», - dedi ol vedomstvoda ótken brıfıngte.
Osyǵan baılanysty Іshki ister mınıstrligi ata-analardy balalarynyń ýaqyt ótkizýine baqylaýdy kúsheıtýdi surap otyr.
«Balalardyń qorshaǵan ortasyn zerttep, olardyń jazǵy demalys kezinde bos ýaqytyn uıymdastyrý kerek. Jasóspirimniń jeke zattaryndaǵy ızolenta, kishkentaı paketter, qaltalyq elektrondyq tarazy, dári salynǵan blısterler nemese kóz tamshylarymen shólmekter qaýip-qater belgisi sanalady. Telefonynda kire beristerdiń, aıaldamalardyń, úı qabyrǵalarynyń sýretteri bolsa jáne eń bastysy – ata-anasy satyp almaǵan jáne olardyń qaıdan kelgenin jasóspirim túsindirgisi kelmeıtin jańa qymbat zattar kúdik týǵyzýy kerek», - dedi ІІM ókili.
Onyń aıtýynsha, osy belgilerdiń barlyǵy kámeletke tolmaǵannyń esirtkiniń zańsyz aınalymyna qatysý qaýip-qaterin anyq kórsetedi.
«Mundaı belgiler bolmasa da balany esirtki ótkizýge tartýy múmkin ekendigi týraly onymen mindetti túrde sóılesýge keńes beremiz», - dedi ol.
