«Balańyz dýalanǵan» dep aqsha talap etetin alaıaqtar kóbeıdi — polıtsııa
ASTANA. KAZINFORM — Polıtsııa ınternette ózin emshi, kóripkel nemese balger retinde tanystyryp, «balańyz qatty dýalanǵan» dep azamattardy qorqytyp, aqyly túrde «emdeýdi» usynatyn alaıaqtar jıilegenin eskertti.
Alaıaqtar áleýmettik jeliler men messendjerler arqyly adamdarmen baılanysyp, túrli «belgilerdi» alǵa tartady. Olar jaǵdaıdyń qıyn ekenin aıtyp, jábirlenýshilerge «dýany qaıtarýdy» nemese «em júrgizýdi» usynady.
Osydan keıin «emge qajetti zattardy satyp alý», «em júrgizý» nemese «dýany qaıtarý» degen syltaýmen aqsha aýdarýdy talap etedi.
Polıtsııa mundaı adamdardyń azamattardyń qorqynyshy men alańdaýshylyǵyn paıdalanyp otyrǵanyn atap ótti.
Quqyq qorǵaý organdary turǵyndarǵa ınternettegi beıtanys adamdardyń emdep jazý nemese kóz tııýden aryltý týraly ýádelerine senbeýge shaqyrdy. Sondaı-aq tanys emes adamdardyń esepshottaryna aqsha aýdarmaý, jeke derekterdi, bank kartasynyń málimetterin jáne SMS arqyly keletin kodtardy eshkimge bermeý qajet.
Polıtsııa kúmándi jaǵdaıǵa tap bolǵan azamattarǵa hat almasý tarıhyn jáne aqsha aýdarylǵany týraly túbirtekterdi saqtap qoıýǵa keńes beredi.
Alaıaqtyqtyń qurbany bolǵan nemese osyndaı jolmen aqsha talap etilgen jaǵdaıda, 102 nómirine habarlasý qajet.
Eske salaıyq, buǵan deıin Ádilet mınıstrligi de azamattardy «nekeni uzartý» týraly habarlandyrýlardan saq bolýǵa úndep, kúmándi siltemelerge ótpeýdi eskertken edi.
