Balanyń ulty belgisiz bolsa ony qalaı anyqtaıdy

ASTANA. KAZINFORM — Konstıtýtsııalyq Sot «Neke (erli-zaıyptylyq) jáne otbasy týraly» kodekstiń 65-babynyń Konstıtýtsııaǵa sáıkestigin qarady. Bul bapta balanyń ulty tek ata-anasynyń bireýiniń ultyna qaraı aıqyndalady dep kórsetilgen. Alaıda naqty is boıynsha ata-anasynyń ulty belgisiz bolǵan jaǵdaıda balanyń ultyn anyqtaý múmkin bolmaǵan. 

Konstıtýtsııalyq Soty «Neke (erli-zaıyptylyq) jáne otbasy týraly» kodekstiń (NOtK) 65-babynyń Konstıtýtsııanyń 19-babynyń 1-tarmaǵyna sáıkestigin tekserý jónindegi ótinishti qarady.

Atalǵan bapta balanyń ulty ata-anasynyń ultymen aıqyndalady jáne budan ári ol tek qana ata-anasynyń bireýiniń ultyna ózgertilýi múmkin dep bekitilgen.

— Balanyń anasy qaıtys bolǵan. Tiri kezinde onyń qujaty bolmaǵan. Balanyń ákesi týraly derekter joq. Qolda bar málimetter negizinde qamqorshy ata-anasynyń ulty boıynsha onyń ultyn odan ári aıqyndaý úshin balanyń týýy týraly akt jazbasyna qosymsha engizýge tyrysqan, biraq rastaıtyn qujattardyń bolmaýyna baılanysty bas tartyldy. Keıin sot ta NOtK-tiń 65-babyna silteme jasaı otyryp, balanyń ultyn aıqyndaý, eger onyń ata-anasynyń ulty aıqyndalmasa, múmkin emes dep sheshti. Ótinish berýshi NOtK-tiń 65-baby Konstıtýtsııanyń 19-babynyń 1-tarmaǵyna qaıshy keledi dep esepteıdi, atalǵan tarmaqqa sáıkes árkim óziniń qaı ultqa jatatynyn aıqyndaýǵa jáne ony kórsetý-kórsetpeýge quqyly, — delingen habarlamada.

Konstıtýtsııalyq Sot Konstıtýtsııanyń maǵynasy boıynsha ultty aıqyndaý adamnyń ózin-ózi sáıkestendirýimen baılanysty ekenin, oǵan otbasylyq jáne týystyq baılanystar men basqa da jaǵdaılar áser etýi múmkin ekenin kórsetti.

Ata-anasynyń ultyna negizdelgen tańdaý, árıne, basymdyqqa ıe, sonymen birge mundaı tańdaý túrli ómirlik jaǵdaılarǵa (ata-anasy belgisiz, olardyń ulty týraly aqparat joq, balany basqa adamdar asyrap alǵan nemese tárbıelegen jáne t. b.) baılanysty árdaıym múmkin emes. NOtK-tiń 65-baby mundaı jaǵdaılardy eskermeıdi jáne osylaısha Konstıtýtsııada belgilengenge tolyq sáıkes kelmeıdi.

Konstıtýtsııalyq Sot sonymen qatar ulty jeke basyn kýálandyratyn qujattarda kórsetilgen nemese basqa da quqyqtyq mańyzy bar kezde adamnyń belgili bir ultqa jatýǵa degen umtylysy jetkiliksiz ekenin atap ótti. Memleket mundaı jaǵdaılarda adam usynǵan málimetterdi teksere alady.

— Konstıtýtsııalyq Sot NOtK-tiń atalǵan babyn ata-anasy belgisiz bolǵan nemese olardyń ultyn anyqtaý múmkin bolmaıtyn jaǵdaılarda, sondaı-aq azamattyń zańdy múddelerin qozǵaıtyn basqa da ómirlik jaǵdaılar kezinde balanyń ultyn aıqyndaý men ózgertýdiń ózge tásilderin (ata-anasynan basqa) kózdemeıtin bóliginde Konstıtýtsııaǵa sáıkes kelmeıdi dep tanydy. Bul rette Konstıtýtsııalyq Sot ata-anasy boıynsha ultty aıqyndaý men ózgertýdiń konstıtýtsııalylyǵyna kúmán keltirmedi, — delingen Konstıtýtsııalyq sot habarlamasynda.

Aıta ketelik elimizde azamattarǵa quqyqtyq keńes beretin jasandy ıntellekt ázirlenedi.