Balanyń tisin julam dep múgedek qylǵan emhana nebary 1,5 mln teńge ótemaqy tóleıdi

QYZYLORDA. KAZINFORM — Qyzylorda turǵyny balasynyń tisi aýyrǵanda ortalyq qalalyq emhananyń balalar stomatologııasyna baryp, tis juldyrǵan. Munyń sońy aýyr saldarǵa aparyp soqty. 

Emdeýden keıingi kelesi kúni balanyń jaq súıegi isinip, jalpy densaýlyǵy nasharlaǵan. 

Keıin balaǵa oblystyq kópsalaly aýrýhananyń jaq-bet bólimshesinde «Sol jaq tómengi jaqtyń jedel irińdi odontogendi flegmonasy, 7,5 tisin julǵandaǵy jaǵdaıy» dıagnozymen eki ret ota jasalǵan.

Arada alty aı ótkende balanyń jaq súıegi qaıta isip, irińdi jarasy jazylmaǵandyqtan olar Almaty qalasynda aqyly negizde aýrýhanada emdelip, operatsııa jasatýǵa májbúr bolǵan.

Medıtsınalyq jáne farmatsevtıkalyq baqylaý departamenti ananyń shaǵymy boıynsha júrgizilgen emhanany tekserý qorytyndysyna sáıkes, tis dárigeri kámeletke tolmaǵan balaǵa medıtsınalyq kómek kórsetý kezinde klınıkalyq dıagnostıka jáne emdeý hattamasyn saqtamaǵan.

Onyń tisin orta medıtsınalyq bilimi bar stomatolog alyp tastaǵan, emdeý aldynda jaq súıeginiń rentgenografııasy obektıvti tekserilmeı, asqynýlar — tómengi jaqtyń qabyný protsesi bolǵan.

Balanyń anasy stomatologııalyq emhanadan ózine kelgen moraldyq jáne materıaldyq shyǵyndy óteýdi surap, sotqa júgingen.

Talabynda ol emhana medıtsına qyzmetkeriniń salǵyrttyǵynan jáne alǵashqy medıtsınalyq kómekti durys kórsetpeýinen aýrý asqynyp, bala 2 jylǵa jýyq uıyqtaı almaı, dárigerlerdiń qorytyndysy boıynsha múgedek bolyp qalǵanyn kórsetken. 

Sondaı-aq olar aqyly negizde úsh operatsııa jasaýǵa, tis emdeýge jáne dárigerlerden keńes alýǵa májbúr bolǵan.

Sot stomatologııalyq emhanadan moraldyq jáne materıaldyq shyǵyn úshin 1,5 mıllıon teńgeden astam ótemaqy óndirdi.