Balanyń TikTok-taǵy ýaqytyn qalaı basqarý kerek – vıtse-premer Ermek Kósherbaevtan laıfhak
ASTANA. KAZINFORM – Premer-mınıstrdiń orynbasary Ermek Kósherbaev Májilis depýtattarynyń saýalyna joldaǵan jaýapta balanyń TikTok-taǵy ýaqytyn qalaı basqarý joldaryn ataǵan.
- TikTok parametrlerindegi kámeletke tolmaǵandardyń qaýipsizdigi úshin ata-analar «Rodıtelskıı kontrol» (ata-ana baqylaýy) baǵdarlamasyna qosylyp, «Semeınye nastroıkı» baǵdarlamasy arqyly ata-ana jasóspirimniń eseptik jazbasyn (akkaýnt) óz eseptik jazbasymen baılanystyra alady, - dep jazylǵan resmı jaýapta.
Bul tetik arqyly ata-ana balasynyń qolyndaǵy gadjettiń ekran ýaqytyn shektep, eseptik jazbanyń qupııalylyq ornata alady, jeke habarlamalardy qaýipsiz etip baptaı alady.
- TikTok onlaın platformasynyń ishki erejesine sáıkes, ony 13 jastan asqan adamdar ǵana qoldana alady jáne platformadaǵy keıbir múmkindikterge kámelet jasyna tolmaǵan jastar úshin qol jetkize almaıdy. TikTok platformasyn paıdalanýshylar ekran ýaqytyn 40, 60 mınýt, bir jarym saǵat nemese kez kelgen basqa qalaǵan ýaqytqa ornatý arqyly jasóspirimderdiń onlaın platformany paıdalaný ýaqytyn shekteı alady. Al ata-analar ornatqan ýaqyt shegi aıaqtalǵannan keıin jasóspirimderden áleýmettik jelini paıdalanýdy jalǵastyrý úshin qupııa sózdi engizý suralady. Ol qupııa sózdi engizgen jaǵdaıda ǵana qosymsha 30 mınýtqa qosa alady. Ata-analar belgilengen keste boıynsha TikTok habarlandyrýlaryn óshire alady. Atap aıtqanda, 13 pen 15 jas aralyǵyndaǵy paıdalanýshylar 21:00-den bastap, al 16-17 jas aralyǵyndaǵy jasóspirimder 22:00-den bastap habarlama almaıdy, - dep jazady Ermek Kósherbaev.
Jaýapta Oqý-aǵartý mınıstrligi balalarǵa arnalǵan SIM-karta engizý máselesin áli pysyqtap jatqany da aıtylǵan.
- Arnaıy SIM kartanyń kómegimen ata-analar balalaryn baqylap, olardyń onlaın ýaqytyn shekteı alatyn bolady. Muqııat taldaý júrgizip, halyqaralyq tájirıbeni zerdelegennen keıin bul bastama zańnamalyq deńgeıde bekitiledi, - delingen vıtse-premer jaýabynda.
Eske salsaq, TikTok-tyń bas kompanııasy ByteDance Eýropa qoldanýshylarynyń jeke derekterin Qytaıǵa zańsyz jibergeni úshin 500 mln eýrodan astam aıyppul salynýy múmkin degen aqparat taraǵan bolatyn.