Balanyń múddesi basty orynda: Konstıtýtsııalyq Sot mańyzdy qaýly qabyldady
ASTANA.KAZINFORM — 11 maýsymda Konstıtýtsııalyq Sot ajyrasqannan keıin balalar men ata-analardyń quqyqtaryn qorǵaýǵa qatysty mańyzdy sheshim qabyldady. Bul týraly Bas prokýratýra málim etti.
Másele sot ata-ananyń balamen aralasý tártibin belgilep qoıǵan jaǵdaılar týraly bolyp otyr.
Mysaly, sot ákeniń nemese ananyń balamen belgili bir kúnderi jáne belgili bir ýaqytta kezdesýge quqyǵy bar ekenin anyqtaıdy. Alaıda is júzinde ekinshi ata-ananyń bul sot sheshimin oryndamaıtyn jaǵdaılary jıi kezdesedi.
Mundaı jaǵdaılarda azamat sot sheshimin oryndatý úshin jeke sot oryndaýshysyna júginýge májbúr bolady.
— Qoldanystaǵy zańnama jeke sot oryndaýshysynyń qyzmetine aqy tóleý mindetin tek sot sheshiminiń oryndalýyna kedergi keltirgen ata-anaǵa ǵana emes, sonymen qatar sot sheshimi óz paıdasyna shyǵarylǵan ata-anaǵa da júkteıdi, — delingen prokýratýranyń habarlamasynda.
ıAǵnı, adam aldymen sotta jeńip shyǵady, keıin óziniń zańdy quqyǵyn júzege asyrý úshin qosymsha aqy tóleýge májbúr bolatyn.
Konstıtýtsııalyq Sot mundaı tásildi Konstıtýtsııaǵa qaıshy dep tanydy.
Eger adam óz paıdasyna shyǵarylǵan sot sheshiminiń oryndalýy úshin aqy tóleýge májbúr bolsa, bul onyń quqyqtaryn qorǵaýǵa qosymsha kedergi keltiredi.
Demek, qaýlynyń negizgi máni mynada: eger sot ata-ananyń balamen aralasý quqyǵyn rastaǵan bolsa, onda bul quqyqty júzege asyrýǵa eshqandaı kedergi, onyń ishinde materıaldyq kedergiler de bolmaýǵa tıis.
— Konstıtýtsııalyq Sottyń bul sheshimi tek ata-analar úshin ǵana emes, eń aldymen balalar úshin mańyzdy. Ol otbasylyq baılanystardy saqtaýǵa jáne balanyń múddelerine saı kelgen jaǵdaıda onyń eki ata-anasymen de qarym-qatynas jasaý múmkindigin qamtamasyz etýge baǵyttalǵan, — dep túsindirdi vedomstvodan.
Úkimetke alty aı ishinde zańnamaǵa ózgerister engizý jáne jeke sot oryndaýshylary qyzmetine aqy tóleý tártibin Konstıtýtsııalyq Sottyń quqyqtyq ustanymdaryna sáıkes keltirý tapsyryldy.
Konstıtýtsııalyq Sottyń normatıvik qaýlysynyń tolyq mátinimen myna silteme arqyly tanysa alasyz.
Aıta keteıik, budan bylaı balanyń qaýipsizdigin qamtamasyz etpegen ata-analar jaýapqa tartylýy múmkin.
