Balanyń kózinshe qos kórshisin óltirgen: Qyzylordada rezonansty is boıynsha úkim shyqty
QYZYLORDA. KAZINFORM — Qyzylorda oblysynyń qylmystyq ister jónindegi mamandandyrylǵan aýdanaralyq soty balanyń kózinshe qos kórshisin óltirgen qala turǵynyna qatysty úkim shyǵardy.
Oqıǵa bıyl 8 qańtar kúni túngi saǵat 01:00 shamasynda bolǵan.
— Sottalýshy ózi turatyn jataqhana úlgisindegi úıdegi páterinde spırttik ishimdik ishken. Kórshisiniń buǵan deıin qoımadaǵy gıtarasyn laqtyryp tastaǵany esine túsip, bolmashyny jeleý etip, pyshaq alyp, jábirlenýshilerdiń páterine barǵan. Aldymen ájesine birneshe jerden pyshaq jaraqatyn salady. Sol sátti kórgen kámeletke tolmaǵan jábirlenýshi ózin, ájesin jáne anasyn óltirmeýdi surap, jalynǵan kezde «ári ket, jaǵalaspa» dep ıterip jibergende pyshaq betin tilip ótedi. Kámeletke tolmaǵan jábirlenýshiniń anasynyń jýyný bólmesine tyǵylyp qalǵanyn baıqaǵan sottalýshy ony artynan qýyp baryp, bólmeniń esigin julyp alyp, birneshe jerinen pyshaq jaraqatyn salyp, óltirgen. Sol kezde kámeletke tolmaǵan jábirlenýshi uıaly telefony arqyly synyptasyna sms habarlama jiberedi. Sonyń arqasynda kórshiler polıtsııa shaqyryp, kámeletke tolmaǵan jábirlenýshi aman qalady, — delingen habarlamada.
Sottalýshy Qylmystyq kodekstiń 99-baby 2-bóliginiń 1, 5-tarmaqtary jáne 107-baby 2-bóliginiń 8-tarmaǵynda kózdelgen quqyqbuzýshylyqty jasaǵany úshin kináli dep tanyldy. Sot oǵan Qylmystyq kodekstiń 58-babynyń 4-bóligine sáıkes onsha qatań emes jazany neǵurlym qatań jazaǵa sińirý arqyly túpkilikti ómir boıy bas bostandyǵynan aıyrý jazasyn taǵaıyndady.
Qyzylorda qalasynda 8 qańtarǵa qaraǵan túni pyshaq jaraqaty saldarynan qala turǵyny jáne onyń 34 jastaǵy qyzy kóz jumǵanyn oblystyq polıtsııa departamenti habarlaǵan bolatyn.
