Balanyń qaýipsizdigin qamtamasyz etpegen ata-analar jaýapqa tartylýy múmkin
ASTANA. KAZINFORM — Bul týraly qalalyq Ortalyq kommýnıkatsııalar qyzmetinde ótken baspasóz májilisinde Astana qalasy Polıtsııa departamenti Qoǵamdyq qaýipsizdik basqarmasy bastyǵynyń orynbasary, polıtsııa podpolkovnıgi Erkin Janabil aıtty.
Onyń aıtýynsha, polıtsııa qyzmetkerleri balalardyń qaýipsizdigin qamtamasyz etýge baǵyttalǵan profılaktıkalyq jumystardy turaqty júrgizip keledi.
— Jyl basynan beri Polıtsııa departamentiniń qyzmetkerleri 5 652 profılaktıkalyq dáris ótkizdi. Shamamen 10 myń ata-ananyń qatysýymen 275 ata-analar jınalysyn uıymdastyrdy. Sonymen qatar 900-den astam jadynama taratylyp, 2 900 úı chattary men 1 500 ata-analar chatyna aqparat joldandy, — dedi basqarma ókili.
Spıkerdiń aıtýynsha, balalardyń qaýipsizdigi eń aldymen ata-analardyń jaýapkershiligine baılanysty.
— Balalardyń qaýipsizdigin qamtamasyz etý jónindegi mindetterdi oryndamaǵan jaǵdaıda ata-analarǵa Qazaqstan Respýblıkasy Ákimshilik quqyq buzýshylyq týraly kodeksiniń 127-babyna sáıkes ákimshilik jaýapkershilik qarastyrylǵan, — dedi Erkin Janabil.
Polıtsııa departamenti ata-analardy balalardy qaraýsyz qaldyrmaýǵa, olardyń ómiri men densaýlyǵyna qaýip tóndirýi múmkin jaǵdaılardyń aldyn alýǵa jáne qaýipsizdik talaptaryn qatań saqtaýǵa shaqyrdy.
Aıta keteıik, Astanada jyl basynan beri 7 bala terezeden qulap, mert boldy.
