Balanyń qatarlastarynan qysym kórip júrgenin qalaı bilýge bolady

ASTANA. KAZINFORM – Bilikti psıholog Janar Seıitmaǵambet balanyń qatarlastarynan qysym kórip júrgenin anyqtaý joldaryn aıtyp berdi.

– Balalardyń arasyndaǵy býllıng, ıaǵnı qysym kórsetý men mazaqtaý – úlken alańdaýshylyq týdyrady. Eń áýeli balanyń psıhologııalyq jaǵdaıyn nazar aýdarý kerek. Ata-anasy balasymen kúnde sóılesetin bolsa, kúndelikti ózin qalaı ustaıtynyn, qandaı áreketter jasaıtynyn bilýi kerek. Eger bala qandaıda bir qysym kórip júrgen bolsa, onyń kóńil-kúıinen ózgeris baıqalady. Mazasyzdyq, uıqysyzdyq belgileri de bolady. Sodan keıin mektepke barmaımyn, basqa mektepke aýysaıyn dep qashqaqtaı bastaıdy. Ne bolmasa, mektepke kettim dep, basqa jaqta júredi, - dedi Janar Seıitmaǵambet «JibekJoly» arnasyndaǵy «BúginLive» baǵdarlamasynda. 

Psıholog maman mundaı jaǵdaıda balamen qalaı sóılesý kerektigin, ári tyǵyryqtan qalaı shyǵýǵa bolatynyn aıtty.

– Birinshi kezekte – bala tárbıesine nazar aýdarý kerek. Onyń boıyna senimdilik uıalatatyn sózder aıtyp, jigerlendirip otyrý kerek. Joǵaryda aıtyp ótkenimdeı, balany mektepten-mektepke aýystyryp júre almaısyz ǵoı. Sondyqtan balanyń ishki damýyna kóp kóńil bólgen jón. Ata-analar kóp jaǵdaıda balasyn qorqytyp, ursyp ósiredi. Buny otbasyndaǵy qysym deýge bolady. Odan keıin bala úıde de syrtta da ashyla almaı, jasqanshaq bola bastaıdy. Ózin bárinen tómen sanaıdy. Bala ata-ananyń qoldaýyn únemi sezip turýy kerek, - dedi psıholog.

Maman pikirinshe, óziniń qundy ekenin bilgen bala – basqa balanyń da qundy ekenin biledi.

Buǵan deıin, Soltústik Qazaqstan oblysyndaǵy olımpıadalyq rezerv mektebindegi býllıngke baılanysty Balalardyń quqyqtaryn qorǵaý komıteti birqatar shara qabyldaǵanyn jazǵan edik.