Balanyń emine 1,3 mlrd tenge jınap, óz maqsatyna jumsaǵan erli-zaıyptyǵa sot úkimi shyqty

ASTANA. KAZINFORM - Astana qalasynyń qylmystyq ister jónindegi aýdanaralyq soty qaıyrymdylyq maqsatta jınalǵan qarajatty zańsyz paıdalaný deregi boıynsha Daýlet pen Tolqyn Totaqanovtarǵa qatysty qylmystyq is boıynsha úkim shyǵardy.

Sot Daýlet jáne Tolqyn Totaqanovtardy Qazaqstan Respýblıkasy Qylmystyq kodeksiniń kelesi baptary boıynsha kináli dep tanydy. Atap aıtqanda, QK-niń 190-baby 4-bóliginiń 2-tarmaǵy — «Asa iri mólsherdegi alaıaqtyq», QK-niń 218-baby 2-bóliginiń 1-tarmaǵy — «Aldyn ala sóz baılasý arqyly adamdar toby jasaǵan qylmystyq jolmen alynǵan aqsha men ózge múlikti zańdastyrý».

Qylmystardyń jıyntyǵy boıynsha sot árqaısysyn 7 jylǵa bas bostandyǵynan aıyrý jazasyna kesip, jazany ortasha qaýipsizdik deńgeıindegi qylmystyq-atqarý júıesi mekemesinde óteýdi belgiledi. Sonymen qatar sot olardyń múlkin tárkileý týraly sheshim shyǵardy.

Sot úkimimen sottalǵandarǵa 10 jyl merzimge qaıyrymdylyq qyzmetpen aınalysýǵa tyıym salyndy.

Sot anyqtaǵandaı, 2020–2024 jyldar aralyǵynda erli-zaıyptylar Instagram jelisindegi @altair_tota paraqshasy arqyly óz balasynyń aýyr dertke shaldyqqany jáne shuǵyl em qajet ekeni týraly jalǵan málimet taratyp, qaıyrymdylyq qarajatyn jınaǵan. Qarajat tartý maqsatynda olar jazylýshylardyń emotsııasyna áser etetin úndeýler jasap, jınalǵan qarajattyń naqty maqsaty jóninde azamattardy jańylystyrǵan.

Sottyń málimetinshe, jınalǵan qarajattyń edáýir bóligi 1,3 mlrd teńgeden astamy sottalǵandar tarapynan jeke maqsatyna jumsalǵan.

Sonymen qatar QK-niń 74-babynyń 1-bóligine sáıkes, sot kámeletke tolmaǵan balasy bar sottalýshy Tolqyn Totaqanovqa jazany óteýdi 2 jyl merzimge keıinge qaldyrdy.

Buǵan deıin balany emdeýge jınalǵan 1,3 mlrd teńgeni jymqyrý isi boıynsha sottalýshylar sońǵy sózin aıtqan edi.

Sonymen qatar Perızat Qaırat qazaqstandyqtardyń senimin qalaı sán-saltanat kózine aınaldyrǵanyn jazǵan edik.