Balanyń betinen qaqpaýdyń sońy qaıǵyly jaǵdaıǵa ákep soqtyrýy múmkin - Prezıdent
Respýblıkalyq pedagogter sezindegi sózinde Memleket basshysy Qasym-Jomart Toqaev bilim oshaqtarynda qylmystyq psıhologııanyń taralýy sekildi keleńsizdikti túbirimen joıý kerektigin aıtty, dep habarlaıdy QazAqparat Aqordaǵa silteme jasap.
«Tórtinshi másele. Mektep eń qaýipsiz orynǵa aınalýǵa tıis. Mektepte balalar ózderin qaı jaǵynan da jaıly sezinýi kerek. Bógde adamdardyń mektepke kirýine jol berýge bolmaıdy. Sondyqtan, bilim oshaqtarynyń bárine dabyl qaǵý, beınebaqylaý júıesi ornatylady.
Jaqynda Astana mektepteriniń birinde oqys oqıǵa boldy. Oqýshy aýyr jaraqat aldy. Bul jaǵdaı bilim oshaqtarynda qaýipsizdik talaptary tolyq saqtalmaıtynyn kórsetip otyr. Ásirese, kóp jyl buryn salynǵan eski mektepter talapqa saı emes.
Mınıstrlik ákimdiktermen birlesip, mektepterdiń qaýipsizdigin tolyq tekserýi kerek. Sondaı-aq, jańa mektepterdiń jobasyn jasaǵanda bul másele muqııat eskerilýge tıis», - dedi Prezıdent.
Sondaı-aq, Memleket basshysy býllıng máselesine toqtalyp, oǵan tosqaýyl qoıý qajettigin aıtty.
«Ókinishke qaraı, oqýshylardyń bir-birine álimjettik, tipti zorlyq kórsetýi tyıylmaı otyr. Sonyń kesirinen olar óz-ózine ol jumsaýǵa, ıaǵnı sýıtsıdke deıin barady.
Býllıng balalar men jasóspirimderdiń densaýlyǵyna jáne olardyń jan dúnıesine orny tolmas zııanyn tıgizedi. Sondaı-aq, oqý úderisine keri áser etedi. Balalardyń áleýmettik ortadan shettep qalýyna, oı-sanasynyń buzylýyna ákep soqtyrady.
Memleket balanyń quqyǵy men qaýipsizdiginiń qorǵalýyn qamtamasyz etýi kerek. Sondaı-aq, býllıngke birjola tosqaýyl qoıýy qajet», - dedi Qasym-Jomart Toqaev.
Memleket basshysy Prezıdent ákimshiligine qylmys jasaǵandardy zań júzinde jazalaý úshin jaǵdaıdy túgeldeı aıryqsha baqylaýǵa alýdy tapsyrǵanyn málim etti.
«Sońǵy ýaqytta maǵan zorlyq-zombylyq kórgen balalardyń ata-analarynan ótinishter kelip túsip jatyr. Ashyǵyn aıtqanda, mundaı hattardy oqý ońaı emes. Jasóspirimderdiń qylmystyq psıhologııasy men keıbir muǵalimderdiń nemquraılyǵynyń qurbany bolǵan balalardyń jaı-kúıi júrekti aýyrtady.
Men Prezıdent ákimshiligine qylmys jasaǵandardy zań júzinde jazalaý úshin osyndaı jaǵdaılardyń bárin aıryqsha baqylaýǵa alýdy tapsyrdym. Mundaı adamdarǵa basqa aıtar sózim joq.
Іshki ister mınıstrligi, Bas prokýratýra balalardyń qaýipsizdigine qatysty ózderine júktelgen mindetti durys atqarýǵa tıis. Bala quqyqtary jónindegi ombýdsmen mundaı jaǵdaılardyń bárin tirkep, maǵan baıandaýy qajet. Qatań shara qoldanamyz.
Mektepterde zorlyq-zombylyq jasaýshylardy basqa jolmen toqtatý múmkin emes. Bilim oshaqtarynda qylmystyq psıhologııanyń taralýy sekildi keleńsizdikti túbirimen joıý kerek. Sondyqtan, osy jıynǵa Іshki ister mınıstri men Bas prokýrordyń birinshi orynbasarlaryn arnaıy shaqyrdym. Tapsyrmanyń oryndalýyn talap etemiz.
Men kámeletke tolmaǵandarǵa zorlyq-zombylyq jasaǵan adamdardyń jazasyn qatańdatýdy tapsyrdym. Bul bastama jaqyn arada júzege asady.
Jalpy, balaǵa psıhologııalyq qysym jasalmaýyna, eń aldymen, ata-ana jete kóńil bólýi kerek. Ondaı oqıǵa bolsa, mekteptegi medıatsııa qyzmeti muǵalimge jáne ata-anaǵa eskertip, kásibı medıatorlarmen birge balaǵa barynsha kómek berýge tıis», - dedi Prezıdent.
Memleket basshysy osy máselege qatysty ata-analardyń jaýapkershiligin de eske saldy.
«Barsha ata-anaǵa aıtarym: balalaryńyzdyń zorlyq-zombylyq jasaýyna, qoǵamdyq tártipti buzýyna erik bermeńizder. Ásirese, olardy muǵalimderdiń aldynda qorǵamańyzdar. Balanyń betinen qaqpaımyn dep, onyń teris qylyqtaryna kóz juma qaraýdyń sońy keleshekte qaıǵyly jaǵdaıǵa ákep soqtyrýy múmkin. Aldaǵy ýaqytta zańǵa qaıshy áreketterge barmas úshin mektep tártibin buzýshylarǵa aldyn alý sharalaryn qazir qoldanǵan jón», - dedi Qasym-Jomart Toqaev.
Aıta ketsek, búgin Qazaqstanda Ustazdar kúni.
Prezıdent Qasym-Jomart Toqaev respýblıkalyq pedagogter sezinde sóz sóıledi.
