Balanyń áleýmettik jelidegi qaýipsizdigi: Ata-analarǵa arnalǵan tekserý paraǵy jarııalandy
ASTANA. KAZINFORM – Іshki ister mınıstrligi ata-analardy tsıfrlyq saýattylyqqa jáne balalaryn ınternet keńistiginde qorǵaýǵa kóbirek kóńil bólýge shaqyryp, onlaın qaýipsizdik boıynsha jadynama usyndy, - dep jazdy Polisia.kz.
Polıtsııa ata-analardy balalarymen birge negizgi tsıfrlyq qaýipsizdik erejelerin saqtaýǵa shaqyrady. Ásirese bala alǵashqy smartfonyn alǵan kezde nemese áleýmettik jelide alǵashqy akkaýntyn ashqan kezde bul asa mańyzdy.
Negizgi usynystardyń biri – ata-ana baqylaýy fýnktsııasyn paıdalaný. Mundaı baǵdarlamalar qajetsiz kontentti kórsetpeýge, qaýipti saıttardy shekteýge, qarym-qatynasty baqylaýǵa jáne balanyń jeke derekterin qorǵaýǵa kómektesedi.
Sondaı-aq ІІM qosymshalar men oıyndardyń jas ereksheligine qatysty shekteýlerin saqtaýǵa, balanyń jasyna saı kontent tańdaýǵa jáne jasóspirimderdiń akkaýnttaryndaǵy qupııalylyq baptaýlaryn retteýge keńes beredi. Ekran aldynda ótkiziletin ýaqytqa da erekshe nazar aýdarylady. Internette shamadan tys otyrý balanyń densaýlyǵy men psıho-emotsıonaldyq jaǵdaıyna keri áser etýi múmkin. Sondyqtan onlaın jáne oflaın belsendiliktiń arasyndaǵy tepe-teńdikti saqtaý mańyzdy.
Ata-analarǵa balalarmen ınternettegi qarym-qatynas erejelerin aldyn ala talqylaý usynylady: beıtanys adamdarmen hat almaspaý, jeke málimetterdi, fotosýretterdi, mekenjaıdy nemese otbasy týraly aqparatty eshkimge jibermeý qajet.
Budan bólek, vedomstvo ınternet-alaıaqtyq qaýpi týraly da eskertedi. Balalar men jasóspirimder onlaın oıyndarda, marketpleısterde jáne áleýmettik jelilerde alaıaqtardyń qurbanyna aınalýy múmkin. Sondyqtan eresekter onlaın-satyp alýlardy baqylap, tsıfrlyq qaýipsizdik negizderin túsindirýi tıis.
- Tsıfrlyq qaýipsizdik - bul tyıym salý emes, ata-ana men bala arasyndaǵy qamqorlyq, senim jáne ortaq jaýapkershilik, - dep atap ótti ІІM.
Aıta keteıik, DSM balalar densaýlyǵyn nyǵaıtýǵa baǵyttalǵan «Bastaý» is-sharalar keshenin ázirlemek.
