Balany julqylap, qorlady: Almatyda jeke korrektsııalyq ortalyǵyna qatysty tergeý bastaldy

Áleýmettik jelide Golden Kids jeke korrektsııalyq ortalyǵynyń tárbıeshisi balaǵa álimjettik jasaǵany týraly jazba tarady.

Vıdeoda mekeme qyzmetkeriniń balany qolynan jáne betinen dóreki ustap, oǵan aıqaılaǵany kórinedi.

Balanyń anasynyń aıtýynsha, vıdeony oǵan kezekti esep retinde tárbıeshiniń ózi jibergen.

Áıeldiń paıymdaýynsha, qyzmetker vıdeoǵa osy jaǵdaıdyń túsip qalǵanyn baıqamaǵan bolýy múmkin.

- Meniń balam – erekshe bala. Ol sóıleı almaıdy. Úıge kelip, oǵan ne istegenin aıtyp bere almaıdy. Kómek surap, ózin sózben qorǵaı da almaıdy. Biz balalarymyzdy mamandarǵa dál osy sebepti senip tapsyramyz. Biraq balanyń qaýipsizdigine jaýapty eresek adamnyń ózi oǵan zııan keltirse, ony kim qorǵaıdy? Biz qorqytyp, qorlasyn dep emes, qamqorlyq, damý jáne kásibı kómek úshin aqsha tóleımiz. Balamyzdy senip tapsyrǵan jerimiz ony renjitip, uryp-soǵyp, balaǵattap, qorlaıtyn orynǵa aınaldy, – dep jazdy balanyń anasy áleýmettik jelide.

Onyń sózinshe, shamamen bir aı buryn ulynyń minez-qulqynan ózgeristerdi baıqaı bastaǵan.

Almaty qalasy Bostandyq aýdanynyń polıtsııa basqarmasy qyzmetkerleri beınejazbany zerdelep, tárbıeshi men mekeme basshylyǵynyń áreketterin tekserip jatyr.

- Almaty qalalyq Polıtsııa departamenti kámeletke tolmaǵandarǵa, ásirese erekshe qamqorlyq pen qoldaýdy qajet etetin balalarǵa qatysty durys qaramaý faktilerine erekshe nazar aýdarady. Atalǵan fakti boıynsha tergeý bastaldy. Bostandyq aýdandyq polıtsııa basqarmasynyń qyzmetkerleri beınematerıaldardy zerdelep, oqıǵanyń barlyq mán-jaıyn, sondaı-aq maman men korrektsııalyq ortalyq basshylyǵynyń áreketterin anyqtap jatyr, - dep málimdedi Almaty polıtsııa departamentiniń baspasóz qyzmeti.

Tekserý nátıjesi boıynsha qoldanystaǵy zańnamaǵa sáıkes quqyqtyq baǵa beriletini aıtyldy.

Eske salsaq, Jambyl oblysynda balabaqsha tárbıeshisine qatysty tergeý bastalǵan edi.