Balany zańsyz jumysqa tartqandarǵa qandaı jaýapkershilik bar
ASTANA. KAZINFORM — Oqý-aǵartý mınıstrligi Balalardyń quqyǵyn qorǵaý komıteti Astanada balalarǵa qoǵamdyq oryndarda zańsyz aqsha jınaý faktisine qatysty túsinik berdi.
— Astanada jasóspirimderdiń qaıyrymdylyqqa aqsha jınaý jáshikterimen ustalǵany týraly aqparat tarady. Kámeletke tolmaǵandardyń kez kelgen qyzmeti, onyń ishinde volonterlik, Qazaqstan Respýblıkasynyń zańnamasy aıasynda ǵana júzege asyrylýy tıis, — dep eskertedi komıtetten.
«Volonterlik qyzmet týraly» zańǵa sáıkes:
— volonter 18 jasqa tolǵan azamat bolýy tıis;
— 18 jasqa tolmaǵandar volonterlikpen tek olardyń densaýlyǵyna, bilimine jáne damýyna zııan keltirmeıtin jaǵdaıda ǵana aınalysa alady;
— 16 jasqa deıingi jasóspirimder úshin ata-anasy nemese zańdy ókiliniń atynan jazbasha kelisimi qajet.
— Kámeletke tolmaǵandardyń eńbegi Eńbek kodeksimen retteledi. Jumys berýshi eńbek shartyn mindetti túrde jasasýy tıis, baǵynbaǵan jaǵdaıda ákimshilik jaýapkershilik qarastyrylǵan. Al balalardy zańmen tyıym salynǵan jumys túrine tartý qylmystyq jaýapkershilikke ákeledi. Sonymen qatar, Qylmystyq kodekstiń 132-babyna sáıkes kámeletke tolmaǵandardy zańǵa qarsy áreketke tartýǵa tyıym salynady. 2024 jyly atalǵan bap boıynsha 23 qylmystyq quqyqbuzýshylyq tirkelgen, — delingen resmı aqparatta.
Osy oraıda Balalardyń quqyǵyn qorǵaý komıteti volonterlik sharany uıymdastyrýshylar men jumys berýshilerdi bala qaýipsizdigin, densaýlyǵy men quqyǵyn qamtamasyz etý úshin zań talaptaryn qatań saqtaýǵa shaqyrady.
Buǵan deıin Astanada balalarǵa «qaıyrymdylyq» jeleýimen kóshede 340 mln teńge qarjy jınatqany týraly jazǵan edik.