Balany ýrologke 1 jastan bastap teksertý kerek

ASTANA. KAZINFORM — Sońǵy ýaqytta erler aýrýy jasaryp barady. Ýrologter buǵan zııandy ádetterge áýes bolý sebep bolatynyn aıtady. 

— Buryndary múshe álsizdigi 40 jastan asqannan keıin baryp paıda bolatyn. Al qazir 25-30 jastaǵy er jigitterdiń ózi osy máselemen kelip jatyr. Eń birinshi kezekte aýrýdyń jasarýyna qozǵalystyń az bolýy sebep. Ekinshiden, energetıkalyq, gazdalǵan sýsyndardy kóp ishý, zııandy ádetterge jıi áýes bolýdyń áseri bar. Onyń bári adam aǵzasynda tabıǵı jolmen bólinetin jasýshalardy zaqymdaıdy. Ol bizdiń erkektik densaýlyǵymyzǵa, erkektik gormondarymyzdyń durys jumys isteýine kedergi keltiredi. Úshinshi sebep — adamnyń psıhıkalyq jaǵdaıy. Buǵan áleýmettik jeliler qatty áser etedi. Adam túrli jarnamalardy kórip, psıhologııalyq turǵyda ózin aýrý sezine berse, psıhogendik múshe álsizdigi bolýy múmkin, — deıdi Talǵat Asylhanuly «Búgin LIVE» baǵdarlamasyna bergen suhbatynda.

Maman erler arasyndaǵy eń basty máselege toqtaldy.

— Ádette adamdar ýrologqa qaralýǵa uıalady. «Sen ýrologqa qaralsań, demek sende bir problema bar» dep oılaıdy. Densaýlyq — saǵan berilgen amanat. Sen erkek bolǵannan keıin otbasyńdy asyraýyń kerek. Ol úshin deniń saý bolý qajet. Al ol úshin tekserilip, gormondyq júıelerińdi baqylap otyrýyń kerek. Uıat dep júrip, bireýler aýrýyn asqyndyryp alyp ta jatady. Shynynda, bedeýlikke qatysty kóbine áıelder tekseriledi. Al erkekter eń sońynda qaralady. Bostan-bosqa qanshama ýaqyt ótkizip, tekserilgen kezde kiná erkekten bolyp shyǵady, — deıdi dáriger.

Ýrolog óziniń tájirıbesinde kezdesken oqıǵalardyń birimen bólisti.

— Maǵan Aqtaýda bir erli-zaıypty keńes alýǵa keldi. Otbasy jeti jyl boıy áıelin kinálap kelgen. Tekserý kezinde erkektiń uryǵyn qaradyq. Al onda spermatozoıd joq bolyp shyqty. Eger er azamat erterek kelip tekserilse, ýaqyt ótkizip, sonsha stressti bastan keshirmes edi. Erterek áreket etsek, uryqty anyqtaýǵa múmkindik bolatyn sátter de kezdesedi, — deıdi stýdııa qonaǵy.

Dáriger balany 1 jastan bastap ýrolog mamandarǵa teksertýge keńes berdi.

— Sebebi kishkentaı kezde nazar aýdarýǵa tıis kóp sátter bar. Atalyq bezdiń umaǵa túspeı qalýy, sýdyń jınalyp qalýy nemese jaryqtardyń paıda bolýy sekildi máselelerdiń bárin 1 jasynda teksertip alý qajet. Sol kezde aýytqýlar anyqtalsa, ony uzaqqa sozyp júrýge bolmaıdy. Máselen, balada krıptorhızm aýrýy anyqtalyp, oǵan mán bermeıtin bolsańyzdar, atalyq bezi damymaı qalýy da múmkin. Al ol damymaı qalsa, bolashaqta bedeýlik pen gormondyq júıeniń buzylýyna alyp keledi. Odan keıin balany tekseretin jas — 3-5 jas aralyǵy. Sebebi bul ýaqytta balalardy súndetteıdi. Kelesi tekseristi 12-14 jasynda jasaǵan jón. Bul kezde ekinshi jynystyq belgiler damıdy. Bala durys damyp jatyr ma — mine, sony teksertý kerek. Bul ýaqytta balanyń gormondyq júıesinde buzylystar bolmaýy tıis, — deıdi Talǵat Asylhanuly.

Aıta keteıik, elimizde jyl saıyn 600-ge jýyq bala onkologııalyq aýrýǵa shaldyǵady.