Balany mektepke daıyndaýǵa kómek: Shymkentte 50 myńnan astam ótinish maquldanbady
ShYMKENT. KAZINFORM – Shymkentte ata-analardyń shaǵymynan keıin myńdaǵan otbasynyń balasyn jańa oqý jylyna daıyndaýǵa arnalǵan áleýmettik kómekti ne sebepti ala almaǵany belgili boldy. Bıyl ótinishterdi qaraý jáne tekserý tártibi ózgergen.
Mektep oqýshylary bar kópbalaly analar Shymkent qalasy ákimdigine kelip, bıyl ne sebepti áleýmettik kómek taǵaıyndalmaǵanyn anyqtaýǵa tyrysty. Analardyń aıtýynsha, buǵan deıin olar «Mektepke jol» aktsııasy aıasynda turaqty túrde tólem alyp kelgen. Sondyqtan bıyl da osy qarajatqa úmit artyp, balalaryn jańa oqý jylyna daıyndaýdy josparlaǵan.
Bıyl bir balaǵa beriletin birjolǵy kómek – 51 myń teńge shamasynda. Kópbalaly otbasylar úshin bul qarajat kıim-keshek pen mektep quraldaryn satyp alýǵa jumsalatyn shyǵyndardyń bir bóligin óteýge múmkindik beredi. Áıelder birneshe balany 1 qyrkúıekke birden daıyndaý otbasylyq bıýdjetke salmaq túsiretinin aıtty.
Jaǵdaıǵa qatysty Shymkent qalasy bilim basqarmasynyń basshysy Qýanysh Ysqaqov túsinikteme berdi. Onyń aıtýynsha, mektep oqýshylaryna beriletin kómek toqtatylǵan joq. Tek otbasynyń kómek alýǵa quqyǵyn anyqtaý tártibi ózgergen.
– Úkimet qaýlysyna sáıkes, jergilikti bıýdjet qarajaty esebinen belgili bir áleýmettik sanattarǵa jatatyn bilim alýshylar men tárbıelenýshilerge qarjylaı jáne materıaldyq kómek kórsetiledi. Olarǵa ataýly áleýmettik kómek (AÁK) alatyn otbasylardyń balalary, AÁK almaıtyn, biraq jan basyna shaqqandaǵy ortasha tabysy kúnkóris mınımýmynan tómen otbasylardyń balalary, jetim balalar, ata-anasynyń qamqorlyǵynsyz qalǵan balalar jáne tótenshe jaǵdaılar saldarynan shuǵyl kómekke muqtaj otbasylardyń balalary jatady, – dep túsindirdi Qýanysh Ysqaqov.
Buǵan deıin qujattar tikeleı mektepterde qabyldanatyn. Alaıda otbasynyń tabysyn tekserý barysynda ártúrli memlekettik júıelerdegi málimetterge qol jetkizý qıyndyq týǵyzǵan.
– Balanyń áleýmettik sanatyn anyqtaý kezinde buǵan deıin qıyndyqtar boldy. Keı jaǵdaılarda otbasynyń naqty jaǵdaıy tolyq tekserilmegendikten, belgilengen talaptarǵa sáıkes kelmeıtin adamdar da kómek alyp otyrǵan. Ásirese jan basyna shaqqandaǵy naqty ortasha tabysty anyqtaý qıyn boldy, óıtkeni qajetti málimetterdi ártúrli memlekettik aqparattyq júıelerden tolyq kólemde alý múmkin bolmady, – dedi bilim basqarmasynyń basshysy.
Osyǵan baılanysty Shymkentte qarjylaı jáne materıaldyq kómek alýshylardyń sany jyl saıyn artyp otyrǵan. Máselen, 2024 jyly mundaı tólemdi 46 825 bala alǵan. 2025 jyly alýshylardyń sany 57 047 balaǵa jetken. Al bıyl qala bıýdjetinde shamamen 66 myń oqýshyǵa kómek kórsetýge qarajat qarastyrylǵan.
Bıyldan bastap ótinishter biryńǵaı tsıfrlyq Qosymsha.kz platformasy arqyly qabyldanady. Otbasynyń áleýmettik jaǵdaıyn tekserý mektepterdiń qatysýynsyz júrgiziledi. Bul maqsatta júıe shamamen 25 memlekettik aqparattyq júıemen biriktirilgen.
– Shymkent ákimdiginiń bastamasymen tıisti mınıstrliktermen birlesip memlekettik aqparattyq júıeler ıntegratsııalandy. Endi balanyń qarjylaı kómek alýǵa quqyǵy avtomatty túrde anyqtalady. Otbasy týraly málimetter shamamen 25 memlekettik aqparattyq júıeden alynyp, ózara salystyrylady. Osy málimetter negizinde Ulttyq bilim berý derekter bazasy balanyń belgilengen talaptarǵa sáıkestigin anyqtaıdy, – dedi Qýanysh Ysqaqov.
Ótinish qabyldaý kezeńinde júıege barlyǵy 78 543 ótinish túsken. Onyń 18 927-si qazirgi ýaqytta qaralý ústinde. 9 612 ótinish boıynsha kómek taǵaıyndalǵan, al tıisti tólemder aldaǵy ýaqytta júrgiziledi. Al 50 004 ótinish berýshige kómek kórsetýden bas tartylǵan.
Bas tartýlardyń kóbi ekinshi sanatqa qatysty bolǵan. Bul – ataýly áleýmettik kómek almaıtyn, biraq jan basyna shaqqandaǵy ortasha tabysy belgilengen shekten tómen otbasylar. Málimetterdi avtomatty túrde tekserý barysynda kóptegen otbasynyń atalǵan talapqa sáıkes keletini anyqtalmaǵan.
– Bas tartýlardyń basym bóligi ótinish berýshilerdiń ekinshi sanatqa jatatyny rastalmaǵandyqtan berilgen. Jańa júıe bıýdjet qarajatyn belgilengen talaptarǵa shynymen sáıkes keletin jáne áleýmettik qoldaýǵa muqtaj balalarǵa baǵyttaýǵa múmkindik beredi, – dedi basqarma basshysy.
Jańa júıege qatysty ata-analardy alańdatqan taǵy bir másele bar. Bas tartý týraly habarlamada ótinishtiń qandaı talapqa sáıkes kelmegeni naqty kórsetilmeıdi. Al bul jónindegi aqparatty ázirge bilim basqarmasynan da alý múmkin emes.
Munyń sebebi – Ulttyq bilim berý derekter bazasyndaǵy derbes málimetterge qoljetimdiliktiń shekteýli bolýy. Qazir bul aqparatty ótinish berýshiniń ózi kóre alatyndaı múmkindik jasaý máselesi tıisti mınıstrliktermen birlesip talqylanyp jatyr.
– Ótinish berýshige kómek ne sebepti taǵaıyndalmaǵany týraly naqty aqparat berilýi tıis ekenin túsinemiz. Derbes derekterdi qorǵaý talaptaryna baılanysty basqarma qyzmetkerleriniń bul málimetterge qoljetimdiligi joq. Ótinish berýshige bas tartý sebebin óz betinshe anyqtaýǵa múmkindik beretin tetikti engizý máselesi qarastyrylyp jatyr, – dep túsindirdi Qýanysh Ysqaqov.
Bilim basqarmasy oqýshylardy mektepke daıyndaýǵa arnalǵan kómekti qarjylandyrý jalǵasatynyn atap ótti. Bıyl qala bıýdjetinde shamamen 66 myń balaǵa qarajat qarastyrylǵan.
Buǵan deıin Qazaqstanda balaly otbasylardy qoldaýǵa bıyl qansha qarajat bólingeni týraly habarlaǵan edik.
