Balany qabyldaıtyn kásibı otbasylar ınstıtýty jumysyn bastaıdy
ASTANA. KAZINFORM – Balany qabyldaıtyn kásibı otbasylar ınstıtýty engiziledi. Bul týraly Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine bilim berý jáne balanyń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda talqylaý kezinde Oqý-aǵartý mınıstri Ǵanı Beısembaev aıtty.
«Qıyn jaǵdaıǵa tap bolǵan balalarǵa senim men jylýlyq atmosferasyn qalyptastyrý, psıho-emotsıonaldy jaǵdaıyn saqtaý, kúızelisten qorǵaý, qoǵamda tabysty áleýmettendirý maqsatynda otbasylyq ornalastyrýdyń jańa nysanyn engizý usynylady. Balany qabyldaıtyn kásibı otbasylar ınstıtýtyn engizý kezinde tıisti jańa tásilder ázirlendi. Balalar anyqtalǵannan keıin, balalalar úıine emes, birden otbasylarǵa tabystalady. Árbir bala ata-ananyń nazarymen jáne qamqorlyǵymen qamtylýy úshin bir kásibı otbasynda balalar sany 4-ten aspaıdy. Balany qabyldaıtyn kásibı otbasy mártebesin alýǵa úmitker otbasylar psıhologııalyq daıarlyqtan ótedi», - dedi Ǵanı Beısembaev.
Osy oraıda Parlament Májilisindegi baspasóz máslıhatynda osy jańa ınstıtýtqa qatysty Oqý-aǵartý vıtse-mınıstri Edil Ospan túsinik berdi.
«Zań jobasy ata-ananyń qamqorlyǵynsyz qalǵan nemese qıyn jaǵdaıǵa tap bolǵan balalardy qabyldaýshy otbasylarǵa ornalastyrý ınstıtýty engizilmek. Máselen, qazir balalar osyndaı jaǵdaıǵa tap bolǵanda, birinshi kezekte ınternattyq uıymǵa ornalastyrylady. Otbasynda júrgen balalardyń ómirindegi bul ózgeris stress týdyrady. Sondyqtan zań jobasy aıasynda arnaıy daıyndyqtan ótken, tirkeýge qoıylǵan otbasylar daıyndalady. Osy otbasylarǵa balalar ýaqytsha ornalastyralady. Bul otbasylar balalardy táýlik boıy qabyldaıdy, ıaǵnı kez kelgen ýaqytta balalarǵa otbasylyq qamqorlyq jasaýǵa daıyn bolady. Bul otbasylarǵa aparǵan kezde, balalardy ary qaraı turaqty otbasyna ornalastyrýdyń tetigi júzege asyrylady. Atap aıtqanda, osy balalardy qabyldaı alatyn jaqyn týystary izdestiriledi», - dedi vıtse-mınıstr tilshiler suraǵyna jaýap bere otyryp.
Onyń aıtýynsha, zań qabyldanǵannan keıin 6 aı ýaqyt ishinde jergilikti ákimdikter qabyldaýshy otbasylardy daıyndaıdy.
Osyǵan deıin kolledjderde onlaın oqytý men akademııalyq utqyrlyq engiziletini týraly jazdyq.
