Balany ıtterden aman alyp qalǵan Almaty oblysynyń turǵyny jazalanbaıdy

ALMATY. KAZNFORM – Almaty oblysynyń polıtsııa departamenti balany ıtterdiń shabýylynan aman alyp qalǵan er adamnyń jaýapqa tartylatyny týraly áleýmettik jelide taraǵan aqparatty joqqa shyǵardy.

- Atalǵan azamatqa qatysty eshqandaı protsessýaldyq sheshim qabyldanǵan joq, - delingen polıtsııa habarlamasynda.

Qazaqstan Respýblıkasy Qylmystyq kodeksiniń 32-baby («Qajetti qorǵanys») boıynsha er adamnyń áreketi ózin-ózi qorǵaýǵa jatady. Zańǵa sáıkes, ómirge, densaýlyqqa nemese múlikke naqty qater tóndiretin shabýyldy toıtarý kezinde qajetti qorǵanys jaǵdaıynda zııan keltirý qylmystyq jazalanatyn áreket emes.

- Osylaısha, kámeletke tolmaǵan balany janýarlardyń shabýylynan arashalap qalǵan azamattyń áreketi qoldanystaǵy zań talaptaryn buzbaıdy jáne oǵan zańdy jaýapkershilik júktelmeıdi, - delingen habarlamada.

Sonymen qatar, sotqa deıingi tergep-tekserý sheńberinde janýarlardyń ıesiniń áreketteri jan-jaqty zerttelip, olarǵa tıisti quqyqtyq baǵa beriledi. Zańnama talaptarynyń qandaı da bir zańbuzýshylyq belgileri anyqtalǵan jaǵdaıda, ol zańda belgilengen tártippen jaýapqa tartylady.

Osyǵan deıin Almaty oblysynda balany ıt talaý oqıǵasyna qatysty qylmystyq is qozǵalǵany týraly jazdyq.