Balany emdeýge jınalǵan 1,3 mlrd teńgeni jymqyrý isi: sottalýshylar sońǵy sózin aıtty
ASTANA. KAZINFORM – Astana qalasynyń qylmystyq ister jónindegi aýdanaralyq sotynda balany emdeýge jınalǵan qarajatty jymqyrý jáne alaıaqtyq deregi boıynsha qozǵalǵan isti qaraý aıaqtalýǵa jaqyn.
Tergeý nusqasyna sáıkes, Aıyptalýshylar - Daýlet pen Tolqyn Totaqanovtar 2020–2024 jyldar aralyǵynda aýyr dertke shaldyqqan ulyn emdeý úshin qaıyrymdylyq qarajat jınaǵanymen, aqshanyń qomaqty bóligin – 1,3 mlrd teńgeni jeke maqsatyna jumsaǵan.
Erli-zaıyptylarǵa Qazaqstan Respýblıkasy Qylmystyq kodeksiniń eki baby boıynsha aıyp taǵyldy. Atap aıtqanda, 190-baptyń 4-bóliginiń 2-tarmaǵy – «Asa iri mólsherdegi alaıaqtyq», 218-baptyń 2-bóliginiń 1-tarmaǵy – «Aldyn ala sóz baılasý arqyly adamdar toby jasaǵan qylmystyq jolmen alynǵan aqshany jáne ózge de múlikti zańdastyrý».
Sot otyrysynda aıyptalýshy Tolqyn Totaqanovaǵa sońǵy sóz berildi. Onyń aıtýynsha, otbasy shyn máninde aýyr naýqas balasyn emdeý úshin qarajat jınaǵan jáne ony Túrkııa, Ózbekstan, Ázerbaıjan, Reseı elderine aparyp emdetken. Osy maqsatqa 160 mln teńge jumsalǵanyn jáne bul derektiń sot barysynda dáleldengenin aıtty.
– Osy kezeńde men paıyzǵa aqsha beretin adamdardyń qurbany boldym. Bastapqyda aqshany tek balamdy emdeý úshin qaryzǵa aldym. Alaıda ýaqyt óte kele olar qoqan-loqy kórsetip, ólimmen qorqyta bastady. Sońǵy bes jylda olar bizden 700 mln teńgeden astam qarajatty tartyp aldy. Bul derekterdi aýdıtorlar rastady. Іs boıynsha jábirlenýshi retinde tanylǵandardyń ózi de – paıyzǵa aqsha bergen adamdar. Men olarǵa 40 mln teńgeden astam qarajat tóledim, bul da aýdıtpen dáleldendi, – dedi Tolqyn Totaqanova.
Sondaı-aq ol sottan ózderin jábirlenýshiler qatarynan shyǵarýdy surady.
– Qurmetti sot, meniń áreketterimde qasaqana nıet bolǵan joq. Biz baıyp ketýdi maqsat etken joqpyz. Bizde elıtalyq páter de, qymbat kólik te joq. Mıllıardtarymyz joq ekenin tergeý de dáleldedi. Prokýrordyń ózi bizdiń tek eki bólmeli páterimiz bar ekenin, onyń da bank kepildiginde ekenin aıtty. Bul otbasymyzdyń jalǵyz baspanasy. Men bul is úshin densaýlyǵymmen, balamnyń densaýlyǵymen, abyroıymmen, otbasymmen tóledim. Alty jyl boıy biz óte aýyr joldan ótip kelemiz. Alty jyl boıy balamyzdyń ómiri men densaýlyǵy úshin kúresip júrmiz, – dedi ol.
Eske sala keteıik, tergeý amaldaryna saı, balanyń qatysýymen kórsetilgen beınerolıkter, áserli jazbalar Instagram jáne Facebook arqyly júrgizilgen targettelgen jarnama myńdaǵan qazaqstandyqtyń júregine áser etken.
Azamattardyń senimi men janashyrlyǵyn paıdalana otyryp, kúdiktiler 1,3 mlrd teńgeden astam kólemde qarajat jınaǵan. Alaıda, balanyń emine tek 6,4 mıllıon teńge jumsalǵan. Qalǵan qarajat erli-zaıypty jeke qajettilikterine paıdalanylǵan. Naqty aıtqanda, elordada 3 páter, jer telimi, 5 avtokólik satyp alynǵan. Sonymen qatar qarajattyń bir bóligi qumar oıyndaryna jumsalǵan.
