Balany balabaqshaǵa ne mektepke beretin ýaqyt kelgende ata-analarǵa push-habarlama jiberilmek
ASTANA. KAZINFORM – Bıyl jeltoqsan aıynda balanyń týǵanynan bastap 18 jasqa deıingi kezeńin qamtıtyn tsıfrlyq marshrýt platformasy iske qosylýy tıis. Ol medıtsına, áleýmettik qorǵaý jáne bilim berý salalaryndaǵy qyzmetterdi bir júıege biriktiredi. Bul týraly Quryltaıda ótken Úkimet saǵatynda depýtat Gúlistan Naqbaeva aıtty.
Depýtattyń atap ótýinshe, jańa platforma ata-analarǵa qajetti memlekettik qyzmetterdi bir jerden alýǵa múmkindik beretin «bir tereze» formaty boıynsha jumys isteýi kerek. Alaıda qazirgi ýaqytta tsıfrlandyrý jumystary negizinen áleýmettik qyzmettermen shektelip otyr.
- Bala ómiriniń traektorııasy tolyq kórinip turýy úshin áleýmettik qorǵaý júıesin basqa memlekettik organdarmen jáne óńirlermen ıntegratsııalaý baǵytynda qandaı jumystar atqarylyp jatyr? Sondaı-aq eGov Mobile bazasynda iske qosylatyn tsıfrlyq marshrýt proaktıvti formatta jumys isteı me? Máselen, júıe ata-analarǵa balabaqshaǵa joldama alý, mektepke qabyldaý, úıirmelerge jazylý nemese medıtsınalyq tekserýden ótý qajettigin avtomatty túrde usyna ala ma? – dep surady depýtat.
Depýtattyń birinshi saýalyna jaýap bergen Eńbek jáne halyqty áleýmettik qorǵaý vıtse-mınıstri Bahtııar Jazyqbaevtyń aıtýynsha, bul baǵyttaǵy jumys úsh kezeń boıynsha júrgizilip jatyr.
Birinshi kezeńde mınıstrlik pen jergilikti atqarýshy organdar kórsetetin memlekettik qoldaýdyń 13 túri tolyq tsıfrlandyrylǵan. Buǵan deıin qaǵaz túrinde rásimdelgen qyzmetter qazir elektrondy formatqa kóshirilgen. Vıtse-mınıstrdiń málimetinshe, mamyr aıynan beri osy qyzmetter boıynsha 35 myńnan astam ótinim túsken.
Ekinshi kezeńde ortalyq memlekettik organdardyń aqparattyq júıelerin ózara ıntegratsııalaý jumystary júrgizilip jatyr. Atap aıtqanda, Oqý-aǵartý mınıstrliginiń jelisi boıynsha qarjylaı kómek, tegin tamaqtandyrý jáne balalardy jazǵy lagerlerge jiberý qyzmetteri tsıfrlyq júıege engizilgen.
- Jeltoqsan aıyna deıin Ǵylym jáne joǵary bilim mınıstrligi tarapynan kórsetiletin tegin tamaqtandyrý jáne jataqhana berý qyzmetterin ıntegratsııalaýdy aıaqtaımyz. Osylaısha, biryńǵaı tsıfrlyq platformada balalarǵa beriletin kómek tolyq qamtylady, – dedi Bahtııar Jazyqbaev.
Vıtse-mınıstr taǵy bir mańyzdy baǵyt retinde erekshe qajettilikteri bar balalardy qoldaýdy atady. Qazir osy máselege qatysty zań jobasy ázirlenip jatyr. Tehnıkalyq jumystardy kelesi jyldyń birinshi jartysynda júrgizý josparlanǵan.
Al Jasandy ıntellekt jáne tsıfrlyq damý birinshi vıtse-mınıstri Rostıslav Konıashkın eGov Mobile qosymshasynda balalarǵa arnalǵan memlekettik qyzmetterdi bir bólimge biriktirý jumystary júrip jatqanyn aıtty.
Onyń sózinshe, qazirdiń ózinde qosymsha arqyly balanyń týýyn tirkeý, mektepke qabyldaý jáne kezekke qoıý qyzmetterin alýǵa bolady. Sonymen qatar bilim berý men áleýmettik qoldaý baǵytyndaǵy servıster de qoljetimdi.
- Biz barlyq qyzmetti bir jerge jınaqtaıtyn arnaıy bólim jasap jatyrmyz. Árıne, olardy barynsha yńǵaıly ári proaktıvti etýge tyrysamyz. Mysaly, balany balabaqshaǵa nemese mektepke berý ýaqyty kelgende ata-analarǵa eGov Mobile qosymshasy arqyly push-habarlama jiberiledi, – dedi Rostıslav Konıashkın.
Buǵan deıin búldirshinderge qatysty zorlyq-zombylyq jekemenshik balabaqshalarda jıi bolatynyn jazǵan edik.