Balandın men Nııazymbetov «Daryn» syılyǵyn ıelendi
ASTANA. QazAqparat - Astanada QR Din isteri jáne azamattyq qoǵam mınıstri Nurlan Ermekbaevtyń qatysýymen QR Úkimetiniń «Daryn» memlekettik jastar syılyǵyn saltanatty marapattaý rásimi ótti, dep habarlaıdy QazAqparat.
«Daryn» memlekettik jastar syılyǵy jemisti ǵylymı, shyǵarmashylyq jáne qoǵamdyq qyzmeti úshin daryndy jastardy memlekettik qoldaý maqsatynda eki jylda bir ret 10 atalym boıynsha beriledi. Bıyl eń úzdik ári talantty jastar ǵylym, ádebıet, jýrnalıstıka, sport, halyq shyǵarmashylyǵy, dızaın jáne beıneleý óneri, estrada, teatr jáne kıno, klassıkalyq án jáne qoǵamdyq qyzmet atalymdary boıynsha marapattaldy. 
«Bul syılyq 1993 jyly Prezıdenttiń bastamasymen qurylǵan bolatyn. Onyń basty kózdegeni - elimizge óziniń asqan talantymen túrli salalarda eńbek sińirip júrgen jastarymyzdy qanattandyrý, ózderiniń daryndylyǵymen, qabilettilikterimen kózge túsken jas býyndy marapattaý. Mysaly, sportta, qoǵamdyq qyzmette, klassıkalyq mýzykada, ónerde ter tógip júrgen jastar kóp. Syılyqtyń basty maqsaty - sol jastardy qoldaý, talanttaryn ary qaraı damytýlaryna qajetti qosymsha kúsh-jiger berý. Bul Prezıdenttiń, memlekettiń jastarymyzǵa jasalyp otyrǵan qamqorlyǵynyń belgisi», - dedi N. Ermekbaev.
«Qoǵamdyq qyzmet» atalymy boıynsha, syılyqqa Kámshat Qoskelova, Elına Paýlı, Oljas Sýleımenov pen Jandos Tabylǵanov ıe boldy.
«Sport» atalymynda «Daryn» syılyǵymen Rıo-2016 Olımpıadasynyń chempıony Dmıtrıı Balandın men Ádilbek Nııazymbetov marapattaldy. Balandın tilshilerge bergen suhbatynda, osynaý joǵary deńgeıli syılyqqa ıe bolý ol úshin úlken tosyn syı boldy.
«Bul óte úlken qurmet, ony alǵanyma qatty qýanyshtymyn, «Daryn» syılyǵyn ıelený maǵan úlken shabyt berip otyr. Men bundaıdy kútpegen edim, sondyqtan maǵan bul úlken tosyn syı boldy», - deıdi Olımpıada chempıony Dmıtrıı Balandın.
«Teatr jáne kıno» atalymynda úzdik dep Jasulan Erbolat, Eldar Otarbaev pen Asylhan Tólepov tanyldy.
«Estrada» atalymynda syılyqqa Qaırat Aıdarbekov, Álı Oqapov qol jetkizip otyr.
«Halyq shyǵarmashylyǵy» boıynsha «Daryn» syılyǵyna Jandarbek Bulǵaqov pen Sadjana Myrzalıeva laıyq dep tanyldy.
Oljas Qasymov pen Manarbek Qydyrbaı «Ádebıet» atalymy boıynsha marapattalsa, «Ǵylym» bóliginde jastar syılyǵyn Daryn Bórgekov, Maqsat Jabaǵın, Abylaıhan Eskendirov, Artem Kozlovskıı men Aqnur Turǵymbaeva aldy.
«Dızaın jáne beıneleý óneri» atalymynda Ásel Kemelbaeva jeńimpaz boldy.
«Jýrnalıstıka» boıynsha «Daryn» syılyǵyn Nursultan Qurmanov pen Irına Ten ıelendi.
«Klassıkalyq mýzyka» atalymynda Rahat-Bı Abdysaǵın, Maqsat Júsipov pen Azat Málik marapattaldy.
Barlyq jeńimpazdarǵa «Qazaqstan Úkimetiniń 2016 jylǵy «Daryn» memlekettik jastar syılyǵynyń ıegeri» ataǵy, dıplom, tósbelgi jáne aqshalaı syıaqy berildi.
Aıta ketken jón, «Daryn» syılyǵyna ár jyldary elimizge keńinen tanymal adamdar qol jetkizdi. Olardyń qatarynda - Baqtııar Artaev, Serik Sápıev, Danııar Eleýsinov, Ilıa Ilın, Olga Shıshıgına, Nurlan Ónerbaev, Qydyráli Bolmanov, Erbolat Qudaıbergenov, Dúısen Ordabek, Arman Júdebaev, «Mýz ART», «Báıterek», «Jigitter» toby jáne taǵy basqalar bar.
Іs-sharaǵa QR Parlamenti Májilisiniń depýtattary, memlekettik organ ókilderi, qoǵam qaıratkerleri, úkimettik emes uıym basshylary, kolledjder men joǵary oqý oryndarynyń stýdentteri qatysty.
