Balandın AQSh-ta ótip jatqan halyqaralyq týrnırde eki medal jeńip aldy
NUR-SULTAN. QazAqparat - Qazaqstandyq sýda júzýshiler AQSh-ta ótip jatqan halyqaralyq týrnırden 3 medal ıelendi, onyń ekeýin Dmıtrıı Balandın jeńip aldy, dep habarlaıdy QazAqparat.
QR Ulttyq olımpıadalyq komıteti habarlaǵandaı, qazaqstandyq sportshylar Dmıtrıı Balandın, Ádilbek Mýsın jáne Ádil Qasqabaı 2019 jylǵy álem chempıonatyna arnaıy daıyndyq barysynda AQSh-taǵy CA Dolfin Fran Crippen SMOC halyqaralyq týrnırine qatysýda.
Alǵashqy jarys kúni Balandın 200 metrge brass ádisimen júzýden synǵa túsip, kúmis medal jeńip alsa, Mýsın 200 metrge batterflıaı ádisimen júzýden el rekordyn jańartyp, el qorjynyna ekinshi kúmisti syılady. Al Ádil Qasqabaı 100 metrge erkin ádispen júzýden baq synap, 13-shi orynnan kórindi.
Týrnırdiń ekinshi kúni Balandın brass ádisimen 50 metrge júzýde 27.55 ýaqyt kórsetkishimen ekinshi kúmis júldeni qanjyǵasyna baılady.
Ókinshike qaraı bul kúni Ádil Qasqabaı 50 metrge erkin ádispen júzýden fınaldyq synǵa óte almaı qaldy. Al taǵy bir qazaqstandyq sportshy Ádilbek Mýsın erteń 50 jáne 100 metrge batterflıaı ádisimen júzýden jarys jolyna shyǵady.
