Ajyrasqannan keıin balamen aralasýdyń jańa erejeleri bekitildi
ASTANA. KAZINFORM – Elimizde 2025 jylǵy 13 sáýirden bastap ata-analar men basqa da jaqyn týystar arasynda balamen qarym-qatynas jasaý tártibine baılanysty daýdy sheshýdiń biryńǵaı erejesi qoldanysqa engizildi. Bul týraly Oqý-aǵartý mınıstrliginiń baspasóz qyzmeti habarlady.
Qazaqstanda ajyrasqan soń nemese ata-ananyń bólek turýy kezinde balamen qarym-qatynas tártibi týraly ata-analar men basqa da jaqyn týystar arasyndaǵy daýlardy sheshýdiń biryńǵaı erejeleri kúshine endi. Buǵan deıin de bul máselelerdi qamqorshylyq organdary qarastyratyn, alaıda ár óńirde ártúrli tásil qoldanylatyn. Endi Oqý-aǵartý mınıstrligi bekitken ortaq tártip barlyq óńirde birdeı iske asady.
Ata-anaǵa nemese jaqyn týystaryna — atasyna, ájesine, aǵasyna nemese ápkesine balamen qarym-qatynas jasaýǵa shekteý qoıylǵan jaǵdaıda, balanyń turǵylyqty jeri boıynsha qorǵanshylyq jáne qamqorshylyq organyna ótinish bere alady.
Ótinishke kelesi qujattar qosa tirkeledi:
• jeke kýáliktiń kóshirmesi;
• narkologııalyq jáne psıhıatrııalyq dıspanserlerden anyqtamalar;
• sottylyǵynyń joqtyǵy týraly anyqtama;
• mekenjaıyn rastaıtyn qujat.
— Biz alǵash ret osyndaı kúrdeli de sezimtal máselelerdi sheshýdiń biryńǵaı tártibin engizip otyrmyz. Bul — balanyń quqyǵy men múddesin qorǵaýǵa, onyń jaqyndarymen baılanysyn úzbeýge baǵyttalǵan naqty qadam, — dep atap ótti Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
Qorǵanshylyq organy ótinishti 15 jumys kúni ishinde qarap shyǵady. Osy merzimde mamandar eki tarappen jeke sóılesip, qajet bolsa turmystyq jaǵdaıdy zerdeleıdi. Eger bala 10 jasqa tolǵan bolsa, onyń da pikiri eskeriledi.
Aıta ketelik daryndy balany qalaı tárbıeleý kerektigi jóninde jazǵan bolatynbyz.