Balamen qarym-qatynas quqyǵy: Konstıtýtsııalyq sot jańa sheshim shyǵardy
ASTANA. KAZINFORM — Konstıtýtsııalyq Sot balamen qarym-qatynas jasaý tártibi týraly sot sheshimderin oryndaý kezinde jeke sot oryndaýshysynyń qyzmetine ketetin shyǵyndardy óndirip alýshy men boryshkerge teń bólý normasyn Konstıtýtsııaǵa qaıshy dep tanydy. Bul týraly vedomstvonyń baspasóz qyzmeti málim etti.
Sot mundaı tártip ata-ana men balanyń qarym-qatynas quqyǵyn shektep, ony azamattardyń materıaldyq jaǵdaıyna táýeldi etip qoıatynyn atap ótti. Endi Úkimetke atalǵan másele boıynsha zańnamany Konstıtýtsııalyq Sottyń ustanymyna sáıkes jetildirý usynyldy.
Konstıtýtsııalyq Sot azamattyń ótinishi boıynsha «Atqarýshylyq is júrgizý jáne sot oryndaýshylarynyń mártebesi týraly» Zańnyń 118-baby 1-tarmaǵy ekinshi bóliginiń jáne Ádilet mınıstriniń 2023 jylǵy 27 maýsymdaǵy № 416 buıryǵymen bekitilgen jeke sot oryndaýshysynyń qyzmetine aqy tóleý mólsherlerine eskertpeniń úshinshi abzatsynyń Konstıtýtsııanyń 13-babynyń 2-tarmaǵyna, 27-babyna jáne 76-babynyń 3-tarmaǵyna sáıkestigin tekserdi.
— Daý aıtylyp otyrǵan normalarǵa sáıkes balamen qarym-qatynas jasaý tártibi týraly sot sheshimin májbúrlep oryndatý boıynsha jeke sot oryndaýshysynyń qyzmetine aqy tóleý óndirip alýshy men boryshkerge teń úlestermen júkteledi. Jalpy, atqarýshylyq is júrgizý tetigi sot sheshiminiń oryndalmaý aýyrtpalyǵyn boryshkerge júkteýdi kózdeıdi, — dep habarlady sottan.
Azamattyń pikirinshe, óndirip alý boıynsha qoldanystaǵy quqyqtyq tetik ata-ananyń ózinen bólek turatyn balasymen jeke qarym-qatynas jasaýyna qarjylyq kedergiler keltirip, quqyǵyn shekteıdi.
Konstıtýtsııalyq Sot óziniń sheshiminde qoldanystaǵy zańnamada nekeniń (erli-zaıyptylyqtyń) buzylýy, onyń jaramsyz dep tanylýy nemese ata-anasynyń bólek turýy balanyń ata-anasynyń ekeýimen de jáne basqa da týystarymen tolyq qarym-qatynas jasaýyn, sondaı-aq balanyń da, ata-anasynyń da quqyqtary men múddelerin iske asyrýdy shekteýge negiz bolmaıdy naqty belgilenedi basa atap ótti. Árbir ata-ana balasynyń damý jáne tárbıe alý protsesine tikeleı qatysýǵa mindetti. Sot sheshimderin májbúrlep oryndatý tetigi otbasylyq qarym-qatynasty saqtap qalýda balanyń múddelerin naqty qorǵaýdy qamtamasyz etýge jáne olardy ata-ananyń múliktik jaǵdaıyna baılanysty etpeýge tıis.
— Konstıtýtsııalyq Sot bekitilgen tártip sot sheshiminiń mindetti kúshi týraly konstıtýtsııalyq kepildiktiń qamtamasyz etilý tıimdiligin tómendetedi, jeke sot oryndaýshysynyń qyzmetine aqy tóleý jónindegi mindetti sot sheshimi óz paıdasyna shyǵarylǵan adamǵa júkteıdi dep kórsetip ótti, — delingen habarlmada.
Konstıtýtsııalyq Sot daý aıtylyp otyrǵan normalardy Konstıtýtsııaǵa sáıkes kelmeıdi dep tanydy jáne Úkimetke balamen qarym-qatynas jasaý tártibin aıqyndaý týraly atqarýshylyq qujattar boıynsha jeke sot oryndaýshysynyń qyzmetine aqy tóleý máselelerin retteıtin zańnamany Konstıtýtsııalyq Sottyń osy normatıvtik qaýlydaǵy quqyqtyq ustanymdaryna sáıkes jetildirý jóninde sharalar qabyldaýdy usyndy.
Aıta keteıik, alıment qoryn qurý qaıta usynyldy.
