Balamen aralasýǵa qatysty týystar arasyndaǵy daýdy qorǵanshylyq organy sheshedi
ASTANA. KAZINFORM — Oqý-aǵartý mınıstri 2025 jylǵy 31 naýryzdaǵy buıryǵymen balamen qarym-qatynas quqyǵy boıynsha daýdy sheshý qaǵıdalaryn bekitti.
Atalǵan qaǵıdalar ata-anasynan, bólek turatyn atasy men ájesiniń, aǵa-inileri men apa-qaryndastarynyń balamen aralasý quqyǵyn retteýge baǵyttalǵan.
— Balamen qarym-qatynas ornatýǵa qatysty daý balanyń turǵylyqty jeri boıynsha qorǵanshylyq nemese qamqorshylyq fýnktsııalaryn júzege asyratyn organmen sheshiledi, — delingen buıryqta.
Daýdy sheshý úshin ata-anasymen qatar bólek turatyn atasy men ájesi, aǵa-inileri men apa-qaryndastary (ótinish berýshi) qorǵanshylyq organyna kelesi qujattardy qosa tirkep, ótinish beredi:
— ótinish berýshiniń jeke kýáliginiń kóshirmesi;
— narkologııalyq jáne psıhıatrııalyq dıspanserde esepte joqtyǵy týraly anyqtama;
— sottylyqtyń bar-joǵy týraly anyqtama;
— turǵyn úıge menshik quqyǵyn nemese ony paıdalaný quqyǵyn rastaıtyn qujattardyń kóshirmesi.
Daýdy qaraý ótinish berýshiniń jáne balamen birge turatyn ata-ananyń qatysýymen júzege asyrylady. Sonymen qatar, 10 jasqa tolǵan balanyń ótinish berýshimen aralasý týraly pikiri eskeriledi.
Balamen qarym-qatynas sharttary anyqtalǵannan keıin, sondaı-aq turmystyq jaǵdaıdy tekserý nátıjeleri boıynsha (qajet bolǵan jaǵdaıda), qorǵanshylyq organy daý boıynsha sheshim shyǵarady. Daýdy sheshý týraly ótinish 15 jumys kúniniń ishinde qaralady.
Aıta ketsek, taıaýda Premer-mınıstr Oljas Bektenov Senat depýtattarynyń saýalyna oraı jetim balalardy asyrap alý rásimin jeńildetý baǵytynda qandaı sharalar qolǵa alynǵanyn aıtqan edi.
Eske sala ketsek, elimizde bıyl shildeden bastap balany qabyldaýshy kásibı otbasy engiziledi.