«Balamen almaıdy»: qazaqstandyq analar taksı qyzmetine shaǵymdanyp jatyr

ASTANA. KAZINFORM — Áleýmettik jelide ata-analar kishkentaı balalarymen taksıge mingende kezdesetin qıyndyqtardy talqylap jatyr, dep habarlaıdy Kazinform agenttiginiń tilshisi.

S detmı ne berýt: mamy pojalovalıs na slojnostı s poezdkamı na taksı
Foto: Kazinform / JI

Olardyń aıtýynsha, keıbir júrgizýshiler balasy bar jolaýshylardy avtokreslosyz tasymaldaýdan bas tartady. Al arnaıy qurylǵysy bar kólikti shaqyrý qymbatqa túsedi. Polıtsııa departamenti balalardy arnaıy ustap turatyn qurylǵylarsyz tasymaldaýǵa tyıym salynǵanyn eske saldy.

Bul máseleni Astana turǵyny áleýmettik jelidegi jazbasynda qaıta kóterdi. Áıel balasymen taksıge minbek bolǵanda júrgizýshiler birneshe ret tapsyrystan bas tartqanyn aıtqan. Onyń sózinshe, ol kóbine ekonom sanatyndaǵy kólikti shaqyrady. Alaıda júrgizýshiler jolaýshynyń balalarymen baratynyn bilgen soń tapsyrysty qabyldamaıdy.

Sondyqtan áıelge bıznes sanaty sııaqty qymbatyraq tarıfterdi tańdaýǵa týra keledi. Biraq onyń aıtýynsha, mundaı qyzmetti únemi paıdalaný otbasylyq bıýdjetke salmaq túsiredi.

Ol qoǵamdyq kólikpen jáne jeke kólikpen júrýdiń de ózindik qıyndyqtary bar ekenin atap ótti. Áıeldiń sózinshe, ata-analardyń bárinde birdeı júrgizýshi kýáligi joq nemese balalarǵa arnalǵan avtokreslony únemi ózimen birge alyp júrýge múmkindigi bola bermeıdi.

Jazbaǵa basqa qoldanýshylar da pikir bildirdi. Keıbir ata-analar balalarymen qala ishinde qatynaý kezinde osyndaı qıyndyqtarǵa tap bolatynyn aıtyp, saparǵa qolaıly kólik tabý ońaı emes ekenin jetkizdi.

Al polıtsııa departamenti taksımen balalardy tasymaldaý kezinde Qazaqstannyń jol qozǵalysy erejelerindegi talaptar saqtalýy kerek ekenin eske saldy.

— 12 jasqa deıingi balalar qaýipsizdigin qamtamasyz etetin arnaıy ustap turatyn qurylǵylarmen (avtokreslo nemese býster) tasymaldanýy tıis, — dep habarlady vedomstvo.

Polıtsııa ókilderi taksı shaqyrǵan kezde jolaýshy operatorǵa aldyn ala habarlaýy nemese qosymshada saparǵa balamen shyǵatynyn jáne onyń jasyn kórsetýi qajet ekenin túsindirdi. Bul taksı qyzmetine balalarǵa arnalǵan arnaıy qurylǵysy bar kólikti jiberýge múmkindik beredi.

Al júrgizýshi jolaýshylardyń qaýipsizdigin qamtamasyz etýge jáne balalardy belgilengen talaptardy buzyp tasymaldaýǵa jol bermeýge mindetti.

Buǵan deıin balalar arbasymen avtobýstarǵa kirýge tyıym salynǵany týraly taralyp jatqan málimdemeler shyndyqqa sáıkes kelmeıtinin jazǵan edik.