«Balamaly qýat kózderin tabý - ómirsheń mindet» - BAQ-qa sholý
***
Alashtyń aıbyny men aıbaryna aınalǵan ajarly Astanada Búkilálemdik EHRO-2017 kórmesi ótetin boldy. Kórmeniń de kórmesi bar. EHRO Halyqaralyq kórmesi kúndelikti kóp sharanyń biri emes. Ony ótkizýge álemniń áleýetti elderiniń bári múddeli. Jahandyq mańyzy jóninen Olımpıada men fýtboldan álem chempıonatynan keıingi úshinshi oryndy ıelenetin halyqaralyq asa aýqymdy shara EHRO kórmesi bolyp tabylady. Mine, endi 5 jyldan keıin kezinde Parıjge - Eıfel munarasyn, Londonǵa - Hrýstal saraıyn syılaǵan, al Venaǵa álemdegi eń úlken munarasy bar pavılon turǵyzǵan EHRO Búkilálemdik kórmesi Astanada ótedi. Qazaqstan osy qurmetti jeńip aldy. Mine osyǵan oraı «Egemen Qazaqstan» gazeti 4 jyl boıy tikeleı osy Búkilálemdik kórme máselesimen aınalysqan, barlyq uıymdastyrýshylyq jumystyń basy-qasynda júrgen Ekonomıkalyq damý jáne saýda mınıstrligi Saýda komıtetiniń tóraǵasy, «EHRO-2017 - Astana» Uıymdastyrý komıtetiniń hatshysy Aıdar Qazybaevty áńgimege tartqan. Suhbat «Balamaly qýat kózderin tabý - ómirsheń mindet» degen taqyryppen berilgen.
«Cońǵy kezde jýrnalısterdiń kóp qoldanyp júrgen tásili - suhbat. Árıne júzbe-júz suhbattasyp, keńesken jaqsy. Biraq sonyń arjaǵynda shyndyǵy, tarıhı negiz bolý kerek. Qazirgi kezde syldyr sózge qurylǵan áńgime, suhbattar kóbeıip ketti. Qoǵamdaǵy bolyp jatqan jaǵdaıǵa, qubylysqa janasymy bolsa bir sári. Áıteýir oı aıtý kerek, betti toltyrý kerek dep bósip sóıleı beretinderdiń suhbattaryn oqyp júrmiz», - dep jazady fılologııa ǵylymdarynyń doktory, professor Tursynbek Kákishev «Egemen Qazaqstan» gazetiniń senbilik sanyndaǵy «Óz ónerimizdi ógeısitpeıik» degen taqyryptaǵy maqalasynda. Bul rette ǵalym osy basylymda belgili aqyn, qarymdy jýrnalıst Qorǵanbek Amanjol men ánshi, ónertanýshy Erlan Tóleýtaıdyń «Qaıdasyń, káýsar bulaqtar?» atty qazaq óneriniń qazirgi kezdegi nasıhattalýy jónindegi oı-pikirleri, tolaıym tolǵamdary adamdy eriksiz oılandyratyndyǵyn basa aıtqan.
***
«Kazahstanskaıa pravda» gazetiniń búgingi nómirinde Memleket basshysy Nursultan Nazarbaevtyń pravoslavıelik hrıstıandar men barsha qazaqstandyqtardy Rojdestvomen quttyqtaýy jaryq kórdi. Elbasy óz quttyqtaýynda: «Pravoslavıelik hrıstıandar men barsha qazaqstandyqtardy jarqyn mereke - Rojdestvomen shyn júrekten quttyqtaımyn. Memlekettiń óz azamattarynyń rýhanı umtylysyna degen izgi de syılastyqty kózqarasy - bizdiń elimizdegi dinaralyq kelisimniń eń basty negizderiniń biri. Adamzattyń máńgilik aqıqattaryna, adamgershilikke, ózara qurmet pen qoldaýǵa súıene otyryp, biz barlyq konfessııalardyń damýyna jaǵdaı jasadyq, ortaq úıimiz - Qazaqstan Respýblıkasynda beıbitshilik pen kelisimdi saqtaı aldyq», - deıdi.
***
«8 jasar almatylyq Alýa Qarǵabaeva Karıb araldarynda ótken «Álemniń kishkentaı hanshaıymy-2012» halyqaralyq sulýlyq baıqaýynyń vıtse-mıssi atandy. Bizdiń sulý ataqpen qosa «Úzdik shyǵarmashalyq nómir» sertıfıkaty men Gollıvýdqa shaqyrtý aldy», - dep jazady «Vremıa» gazeti «Alýa, ot tebıa my bez ýma!» degen taqyryptaǵy maqalasynda. Basylymnyń atap ótýinshe, baıqaýǵa álemniń túpkir-túpkirinen kelgen 24 qyz qatysqan. Elimizdiń atynan Alýamen birge «Baıqaýdyń jańa kelbeti» atanǵan úsh jasar semeılik Jánııa Dúısenbaeva men 3 pen 5 jas aralyǵyndaǵy jas sanatynda vıtse-mıss ataǵyn jeńip alǵan 4 jasar almatylyq Sofı Manasıan óner kórsetken.
