Balamaly qýat kózderi ónimniń ózindik qunyn ósirýi múmkin - Vıtse-mınıstr
ASTANA. QazAqparat - Balamaly qýat kózderinen óndiriletin energııany qoldaný Qazaqstanda negizgi ónerkásiptik ónimderdiń ózindik qunynyń ósýine ákep soǵýy yqtımal. Mundaı boljamdy elordadaǵy «Jasyl ósim» forýmynda Energetıka vıtse-mınıstri Bolat Aqsholaqov aıtty, dep habarlaıdy QazAqparat tilshisi.
«Qazaqstanda kómirsýtekti shıkizattyń qoljetimdi ári kómir qorynyń mol ekeni eskerilip otyr. Qazirgi ýaqytta elimizde elektr energııasy men jylýdy, munaı men gazdy óndirýde negizinen kómir qoldanylady. Sebebi, búgingi kúni balamaly qýat kózderiniń tehnologııalary stantsııalarda kómir jaǵýdan góri qymbatyraq. Sondyqtan, balamaly qýat kózderiniń tehnologııalaryna ınvestıtsııa salý arqyly bul sala básekege qabiletti bola túsedi. Sol kezde ǵana osy salanyń jappaı damý dańǵylyna túskenin baıqaýymyz múmkin. Óıtpegen jaǵdaıda biz negizgi ónerkásiptik ónimderdiń ózindik qunynyń ósý máselesimen betpe-bet kelemiz. Sondyqtan, biz eń aldymen ekologııa men ónerkásiptik ósim máselesinde jalpy úılesimdi ekonomıkaǵa basa nazar aýdarýymyz kerek», - deıdi Aqsholaqov.
Vıtse-mınıstr keltirgen málimetke sensek, 2017 jylyóndirilgen «jasyl» energııanyń kólemi - 1,1 mlrd kVt/saǵat. 2018 jyly balamaly qýat kózderi boıynsha qýattylyǵy 140 mVt bolatyn taǵy birneshe óndiris oshaqtaryn iske qosý josparlanǵan. Jalpy, jospar boıynsha balamaly qýat kózderiniń jalpy mólsherin Qazaqstanda 500 mVt-qa jetkizý kózdelgen. Qazirgi ýaqytta bizdiń elimizde 352 mVt bolatyn balamaly qýat kózderin qoldanatyn 508 kásiporyn jumys isteıdi.
