Balamaly energııa negizinde baspana salýshylarǵa jeńildikter berilmek

ASTANA. QazAqparat - QR Prezıdenti Nursultan Nazarbaev Astana balamaly energııany paıdalanýda úlgi bolýy kerektigin aıtty, dep habarlaıdy QazAqparat.

«Ótken jyly «EKSPO» kórmesi ótti, al bıyl tıisti nátıjeni kórsetýimiz kerek», - dedi Memleket basshysy Astanany damytý máselelerine arnalǵan keńes barysynda.

Osy oraıda, Prezıdent balamaly energııamen qamtylǵan nysandar, turǵyn úıler bolýy kerektigin, sonymen qatar kún batareıalary men jel energııasyna qatysty jobalardy iske asyrýǵa nazar aýdarý qajettigin jetkizdi.

Bul turǵyda N. Nazarbaev Astanada atalǵan jobalardyń iske asyrylýy jaǵdaıy týraly surady.

Óz kezeginde elorda ákimi Áset Isekeshev qalada balamaly energııany paıdalanatyn saıabaqtarda, aıaldamalarda, turǵyn úı ǵımarattarynda birneshe jaryqtandyrý nysandary bar ekenin aıtty.

Elbasy balamaly energııa negizinde baspana salatyndarǵa barynsha qoldaý jasaýdy tapsyrdy.

«Ómirzaq (Shókeev - avt) «jasyl» kvartaldy júzege asyrýǵa tyrysty, keıinnen bul ýádesi týraly umytty (...) Ońtústik Koreıada kún jáne jel energııasyn paıdalanatyn tutas kentti kórdim. Bizde de osyndaı jobalarǵa ekpin qoıý kerek», - dedi Prezıdent.

Bul rette Elbasy Qazaqstan EKSPO-ny ótkizgen el retinde bul baǵytqa nazar aýdarý qajettigin qadap aıtty.



Foto: news.dks.com.ua