Balamaly energııa kózderi nelikten tek shalǵaıdaǵy sharýashylyqtarda qoldanylady

ASTANA. QazAqparat – Qazaqstannyń klımaty jel elektr stantsııalaryn salý úshin qolaıly. Bul jaıynda Senat depýtatynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

Aıta keteıik, senator Rysqalı Ábdikerov Úkimet basshysyna joldaǵan depýtattyq saýalynda sý únemdeý tehnologııasynyń qajettilikteri úshin balamaly energııa kózderin salýdy sýbsıdııalaýdy usynǵan bolatyn.

«Jel qondyrǵylarynyń jumys isteýi úshin qajetti jel dálizderiniń bolýyna baılanysty Qazaqstannyń klımaty jel elektr stantsııalaryn salý úshin qolaıly. Alaıda jel dálizi aımaǵynda negizinen jaıylymdar nemese tálimdik jerler ornalasqan. Sonymen qatar balamaly energııa kózderin (jel generatorlary men kún panelderin) paıdalaný sońǵy paıdalanýshylar (aýyl sharýashylyǵy taýaryn óndirýshiler) úshin osy ınfraqurylymǵa tehnıkalyq qyzmet kórsetýdiń joǵary shyǵyndaryna alyp keledi. Osyǵan baılanysty qazirgi ýaqytta balamaly energııa kózderi tek shalǵaıdaǵy sharýashylyqtarda qoldanylady», - dedi Premer-Mınıstr.