Balama oqýlyqtan bas tartyp, bir pánge bir oqýlyq qana qaldyrý kerek - D. Nazarbaeva
ASTANA. QazAqparat - Mektepterdegi oqýlyqtyń balamala túrinen bas tartý qajet. Búgin Parlament Májilisinde ótken Úkimet saǵatynda palata vıtse-spıkeri Darıǵa Nazarbaeva osy máseleni kóterdi.
«Bizge qosymsha, balamaly mektep oqýlyqtaryn engizgenimizge on jyldan asqan joq pa? Osy on jylda nege jettik? Birinshiden, biz logıstıkany betimen jiberip aldyq. Ekinshiden, bul oqýlyqtardyń sapasy syn kótermeıdi, sany kóp bolǵanymen sapasy joq. Qaptaǵan oqýlyq bolǵandyqtan, muǵalimderdiń ózi tipti keıde qaı oqýlyqpen oqytýdy bilmeı dal bolady. Demek, burynǵy keńestik júıege oralǵan jón bolar, árbir pánge bir ǵana oqýlyq bolsyn. Sonda eshkimniń de basy qatpaıdy», - dedi D.Nazarbaeva.
Sosyn depýtat balama oqýlyqtyń qajettiligi artyp otyrsa, onda jergilikti organdar ony bıýdjetten tys qarajatpen qamtysyn degen usynysyn da aıtty. Bul rette vıtse-spıker ata-analar balalaryna bilimdi tereńdete bergisi kelse, sonda ǵana olar óz qarajatyna balama oqýlyqtardy satyp alýǵa bolar edi, degen pikiril alǵa tartty.
«Bizge eshqandaı da ózgertýge bolmaıtyn eń tómengi áleýmettik standart, eń tómengi kónkóristiń shamasy degender bar. Azaıtýǵa da, kóbeıtýge de bolmaıtyn aılyq eseptik kórsetkishimiz bar. Oqýlyq ta sondaı bolsa eken, solaı qaralyq buǵan. Eshkim ózgerte almaıtyndaı bolsyn. Shyndyǵynda, oqýlyqty eń tómengi kúnkóristiń eń tómengi standartymen salystyrýǵa bolady. Óıtkeni bilim - qazirgi tańdaǵy eń eń ózekti másele», - dedi jıynǵa jetekshilik etken vıtse-spıker.
