Balalyq shaq erekshe sátterimen este qalýy tıis - Kúlásh Shámshıdınova
NUR-SULTAN. QazAqparat - QR Bilim jáne ǵylym mınıstri Kúlásh Shámshıdınova bas qaladaǵy balalar merekesine oraı ótip jatqan merekelik sherýge qatysty, dep habarlaıdy QazAqparat tilshisi.
«Qurmetti balalar, búgin mine taǵy bir oqý jylyn aıaqtap, jazǵy demalysqa shyqtyq. Búginnen bastap elimiz boıynsha myńdaǵan lagerler sizder úshin óziniń esigin ashady. Sondaı-aq, jazdaı sizderge arnalǵan túrli baǵyttaǵy tanymdyq sharalar uıymdastyrylatyn bolady. Búgingi mereke bárimizge ortaq, sebebi bala qýansa, bárimiz qýanamyz. Bala baqytty bolsa, bizde baqyttymyz. Balalardy qorǵaý kúnine oraı uıymdastyrylatyn bul merekelik sherýge osy úsh jyldyń ishinde elimiz boıynsha 600 myńnan asa jas jetkenshik qatysýda», - dedi K. Shámshıdınova.
Sonymen qatar, bilim mınıstri balalardyń jarqyn bolashaǵy úshin árbir qazaqstandyq úles qosý kerektigin aıtyp ótti.
«Árbir oqýshynyń balalyq shaǵy erekshe sáttermen este qalýy tıis. Búldirshinderimizdiń bolashaǵynyń beıbit jáne jarqyn bolýy jolynda bizder, qazaqstandyqtar, óz úlesimizdi qosýǵa tıistimiz. Onyń ishinde árıne bilim berýdiń alatyn orny erekshe, biz bul turǵyda bilim berý júıesin kún sanap jetildirý baǵytynda jumys isteıtin bolamyz», - dedi ol.
Buǵan deıin habarlaǵanymyzdaı elordada balalardy qorǵaý kúnine oraı merekelik sherý ótip jatyr.
