«Balalyq shaǵymdy qaıtaryńdar» dep án salǵan sırııalyq qyz búkil álemdi jylatty
ASTANA. QazAqparat - 2015 jyldyń qazan aıynda Sırııadaǵy soǵystan qaza tapqandardyń sany 250 myń adamǵa jetken. Onyń 74 426-sy - beıbit halyq. Qaza bolǵan beıbit turǵyndardyń 12 571-i - kúnásiz sábı.
Ókinishke oraı, eshbir saıası kúsh qanshama beıbit halyqtyń jasyn tógip, qanshama sábıdiń balalyq shaǵyn soǵys otyna órtep jatqan qandy oqıǵalardy toqtata almaı otyr. Esesine, bar joǵy 9 jastaǵy Sırııadan shyqqan Djına Boý Hamdan esimdi qyz bir ánimen ǵana búkil álemge «balalyq shaǵymdy qaıtaryńdar» dep, názik bolmysymen narazylyǵyn bildirdi.
Bir apta buryn balalarǵa arnalǵan álemdik «Daýys» shoýynyń Arab elindegi nusqasyna qatysqan Djınanyń ánin 7 mıllıon 200 myń adam kórip, kózderine jas alǵan. Bul tek - arabsha «Daýys» shoýynyń resmı akkaýnty jarııalaǵan vıdeonyń kórsetkishi. Al, áleýmettik jeli men júzdegen saıttar arqyly Djınanyń jan aıqaıyn tyńdaǵan adam qanshama...!?
Djına Hamdan «Daýys» shoýyna Lıvanda turatyn ánshi qyz Remı Bandalı oryndaǵan «Balalyq shaǵymyzdy qaıtaryńdar, beıbit ómirdi qaıtaryńdar» atty joldary bar ándi aıtyp shyqty. Alaıda, daýysy óte ádemi Djına ánniń ekinshi shýmaǵyn aıta bastaǵanda, kóz jasyna erik beredi... Ánniń sózin umytqannan, bolmasa, án notalaryna daýysy jetpegendikten emes, ózi qatarlas qanshama sırııalyq sábıdiń taǵdyry oıyna túsip, jylady. Osylaısha, qazylar alqasy men zaldaǵy halyqty jylatty. Qara túndeı tunyq kózderinen aqqan jasty eki qolymen kezek-kezek súrtken kip-kishkentaı qyz búkil álemge «Bizdiń jazyǵymyz ne?» dep turǵandaı...
Esterińizge sala keteıik, úkimetke qarsy sharalardan bastalǵan Sırııadaǵy azamattyq soǵys 2011 jyldyń naýryzynan beri toqtaǵan joq.
