Balaly otbasylarǵa qandaı tólemder qarastyrylǵan
ASTANA. KAZINFORM — Astanada balaly otbasylardy qoldaý júıesi memlekettik járdemaqylardy, memlekettik áleýmettik saqtandyrý qorynan tólenetin tólemderdi, kópbalaly otbasylar men marapattalǵan analardy, sondaı-aq múgedektigi bar balalardy tárbıelep otyrǵan ata-analardy qoldaý sharalaryn qamtıdy. Bul týraly Astana qalasy boıynsha Áleýmettik qorǵaý salasynda retteý jáne baqylaý departamentiniń basshysy Asqar Aımaǵambetov málimdedi.
Onyń aıtýynsha, memlekettik járdemaqylar ata-ananyń eńbek qyzmetine qaramastan taǵaıyndalady. Al memlekettik áleýmettik saqtandyrý qorynan tólenetin áleýmettik tólemder azamattardyń joǵaltqan tabysynyń bir bóligin óteýge baǵyttalǵan.
— Birinshi, ekinshi jáne úshinshi bala dúnıege kelgen kezde otbasyǵa 164 350 teńge kóleminde birjolǵy memlekettik járdemaqy tólenedi. Tórtinshi jáne odan keıingi balalar týǵan jaǵdaıda tólem mólsheri 272 475 teńge, — dedi spıker Astana qalasynyń kommýnıkatsııalar alańynda.
Sonymen qatar ol jumys istemeıtin ata-analarǵa bala bir jarym jasqa tolǵanǵa deıin kútimine baılanysty memlekettik járdemaqy beriledi. Bıyl onyń mólsheri birinshi balaǵa — 24 912 teńge, ekinshi balaǵa — 29 454 teńge, úshinshi balaǵa — 33 952 teńge, tórtinshi jáne odan keıingi balalarǵa — 38 493 teńge. 2026 jylǵy 1 tamyzdaǵy jaǵdaı boıynsha Astana qalasynda 7 821 otbasy osy járdemaqyny alyp otyr dep atap ótti.
Al jumys isteıtin ata-analarǵa memlekettik áleýmettik saqtandyrý qorynan bala bir jarym jasqa tolǵanǵa deıin kútimine baılanysty áleýmettik tólem tólenedi. Onyń mólsheri sońǵy eki jyldaǵy áleýmettik aýdarymdar júrgizilgen ortasha aılyq tabystyń 40 paıyzyn quraıdy.
Asqar Aımaǵambetov kópbalaly otbasylardy qoldaý sharalaryna da toqtaldy. Onyń aıtýynsha, kámeletke tolmaǵan tórt jáne odan kóp balasy bar otbasylar kópbalaly otbasy retinde tanylady.
— Kópbalaly otbasylarǵa arnalǵan memlekettik járdemaqy otbasynyń tabysyna qaramastan taǵaıyndalady. Onyń mólsheri tórt balasy bar otbasylarǵa — 69 330 teńge, bes balaǵa — 86 673 teńge, alty balaǵa — 104 000 teńge, jeti balaǵa — 121 360 teńge. Segiz jáne odan kóp balasy bar otbasylarǵa ár balaǵa 17 300 teńgeden tólenedi, — dedi departament basshysy.
Sonymen qatar marapattalǵan kópbalaly analarǵa aı saıyn memlekettik járdemaqy qarastyrylǵan. «Kúmis alqa» ıegerlerine — 27 680 teńge, al «Altyn alqa», «Batyr ana» ataǵyn alǵan jáne I, II dárejeli «Ana dańqy» ordenimen marapattalǵan analarǵa 32 000 teńge kóleminde járdemaqy tólenedi.
Sondaı-aq múgedektigi bar balalardy tárbıelep otyrǵan ata-analarǵa aı saıyn memlekettik járdemaqy beriledi. Bıyl onyń mólsheri 81 871 teńgeni quraıdy. Qazirgi ýaqytta Astana qalasynda mundaı qoldaý sharasymen 12 786 ata-ana qamtylǵan.
Aıta keteıik, balaly otbasylardy qoldaýǵa bıyl 974 mlrd teńge bólindi.
